Alluitsup Paani Utoqqarmiut imeqannginnerat aaqqiivigineqalerpoq
![Alluitsup Paa Alluitsup Paa](/sites/default/files/styles/image_934x467/public/user_pictures/HansenJaneInaAlluitsupPaa__billede_080.jpg?itok=biSge4bQ)
Alluitsup Paani utoqqaat illuanni Utoqqarmiuni ulluni aqqaneq marlunni imeqarsimanani, maanna aaqqiivigineqalersoq, Nukissiorfiit nalunaarput.
Innaallagissamik imermillu pilersuiviup transformatori nutaaq Allutsup Paanut nassiuppaa, kaabilit kissaasinnaasut erngup aqqutaata qerisimasup aatsinneqarnissaanut atorneqartussaq.
Tamanna iluatsippat neriuutigaarput erngup aqqutaa qerisimasoq aqagu aassimassasoq, iluatsilluaruttalu ullumi atulersinnaavoq, Lars Hoffmeyer Nukissiorfiit Kujallermi immikkoortortami pisortaq KNR-imut ippassaq oqarpoq.
Aamma atuaruk Utoqqaat illuat ulluni aqqaneq marlunni imeqanngitsoq
Taanna oqaluttuarpoq piffissami sivisuumi issisiut 20-it 30-illu akornanniissimasoq tamatumalu kingunerisimagaa, kujataani erngup aqqutai arlallit qerrusimanerannik.
Nunaqarfinni ajornartorsiut annertuneruvoq, erngup aqqutai unnuakkut atorneqarpiarneq ajoramik tamatumalu kingunerisaanik qerruttoortarlutik.
Erngup aqqutai nutaanngilisimasut ajornartorsiut annertunerulersippaat, Lars Hoffmeyer oqarpoq.
Tamanna pikkoriffiginerulertariaqarunarparput, erngup aqqutai siusinerusukkut nalilersorlugit misissorlugillu taakkuali nunap iluaniitillugit taarsigassanngorsimanersut takusinnaanngilagut Lars Hoffmeyer oqarpoq.
Transformatori nutaaq atulerpat erngullu aqqutai aappata, tankimik imiisivimmik Alluitsup paani Nukissiorfiit inissiiniarunarput.
Aaqqiissutaagallartussamik nassaarniartariaqarsinnaavugut, erngup aqqutaa maanna qereqqasoq aatsissinnaassanngikkutsigu, maannami kiannerulernissaa ilimanannginnami, Lars Hoffmeyer Nukissiorfiit Kujallermi immikkoortami pisortaq oqarpoq.