Nunaqarfimmi oqaluffik unnuaq unnuap qeqqariartornerani ikuallalersimavoq, ajoraluartumillu nungungajavilluni ikuallalluni. Nanortalimmi politeeq, Adu Silassen, taama ilisimatitsivoq.
Qatserisartut, Sermitsiaq naapertorlugu, qatserisimagaluarput, issinnerali anorlingaatsiarneralu pissutigalugit ikuallanneq qamikkuminaassimavoq.
Innaallagissamut atortut kortsluttersimagunarput, oqaluffiullu annertunersaa ikuallappoq. Ikuallattoqarneranili qujanartumik ajoqusertoqanngilaq.
Alluitsup Paani innuttaasut 374-iupput. Oqaluffik 1926-mi sanaajuvoq. Alluitsup Paani ilagiit ualigaa nalunaaqutaq sisamanut oqaluffiup silataani ataatsimoorlutik tussiaqatigiipput.