Allatuulaartumik quiasaarfigitikkusuppit?
Piitannguaq Alaufesen aamma Valerius Nielsen aatsaat aliikkusersueqatigiilinngillat taamaammat aliikkusersuinissartik qulequtserpaat 'Aaseralaat'. Valerius Nielsen tassaavoq Piitannguaq Alaufesenimik aliikkusersuisartutut 1990-ip nalaani Sisimiuni sungiusaasoq.
- Ukiorpaalunni suleqatigiinnikuuvugut. Taamaammat qulequttamik nassaaginnariarluta quianartunngorlugu inerisartarparput, Piitannguaq Alaufesen KNR.gl-mut oqarpoq.
Piitannguaq Alaufesen maanna Ilulissani najugaqarpoq Valerius Nielsen Sisimiuni najugaqartoq. Tamannali aporfiunngilaq quiasaarisartunut imminnut ilisarisimalluartunut.
- Quiasaarinermi qulequttat tikitassagut ulluinnarni naapitakkaneersuupput. Taakku inuit tarrarsorfigisinnaasaattut quianartunngorlugit aliikkusersuissutigissavagut, Piitannguaq Alaufesen oqarpoq.
Sammisalli sorpiaat quianartunngortinniarneqarnersut aliikkusiartussat arfininngornermi unnukkut nalunaaqut arfineq pingasunut aliikkusersuinerup aallartinnissaanut utaqqisariaqarpaat.
- Ukiut ingerlanernanni aliikkusersuisarsimaqaanga taamaattumik pissangarpiarneq ajorpunga. Kisianni isiginnaariat nuannisaqatiginissaat assut qilanaarisarpara, Piitannguaq Alaufesen oqarpoq.