Qulaarpaa Allannguerusukkussi makigitsi iliuuseqarlusilu

Nunarput namminersulivissimasoq misigissallugu pissanganassagaluarpoq, kisiannili namminersulivinnissaq eqqartorneqartuaannarpoq susoqassananilu. Inuusuttoq rappertartoq, 18-inik ukiulik, Josef Tarrak Petrussen taama isumaqarpoq.
- Namminersulivikkusuppunga, pissutigalugu soorlu fjernsynikkut qallunaatut underteksteqarnani, immaqa tuluttut. Torrakkunartigisoq. Assi © : NAPA
decembarip 04-at 2016 15:15

- Siullerpaamik tusaqqaarakku pissanganaasappoq, kisianni maannakkut oqaluuserisaqattaangaaramikkut nikittoqassananilu uppernarunnaartarpoq.

Namminersulivinnissap eqqartuinnarneqartarnera utaqqikatannarsisartoq taassuma ilanngullugu oqaatigaa.

- Uanga 18-niinnarnik ukioqarpunga, kisianni utoqqaat eqqarsaatigalugit, qanoq utaqqikatannaq. Takorusunnarunartigisoq nuannerunarlunilu.

Makigitsi, suliaqarlusi.

Oqaluinnarnani iliuuseqartoqartariaqartoq, Tarrak isumaqarpoq.

- Makigitsi, suliaqarlusi. Allannguerusukkuit, taava illit allanngueqataarnermi ilaasariaqarputit. Allannguiniarluni uninngaannarlunilu nikittoqarnavianngilaq.

Namminermi namminersulivikkusuppoq.

- Namminersulivikkusuppunga, pissutigalugu soorlu fjernsynikkut qallunaatut underteksteqarnani, immaqa tuluttut. Torrakkunartigisoq.

Piitsuugaanni isumaqanngilaq inuuneq ajortuusoq

Nunatta aningaasaqarnera Danmarkiminngaanniit annertuumik pilersorneqarpoq, nunattami aningaasat isertitaasa affai sinnerlugit Danmarkiminngaanneersuupput.

Taamatullu isikkoqartillugu piffissami qaninnermi namminersulivissagaluarutta nunatsinni innuttaasut piitsuulerulersinnaapput, taavalu meeqqerivinni, atuarfeqarfinni peqqinnissaqarfinni inuinnillu sullissinerit allannguuteqarsinnaallutik.

Tamannali Josef Tarrak Petrussenip annilaanngatiginngilaa.

- Piitsuugaanni isumaqanngilaq inuuneq ajortoq, uanga ooriuteqarpianngilanga, kisianni inuulluarpunga.