Allanngortoqassanngilaq
Naalakkersuinikkut suliaqarneq qanittunnguakkut qimappat, Kim Kielsen-imut allattaavutit 2002-milu atassut tunuliaqutaralugu inatsisartunut qinigassanngortinnikuullutit. Nutaarsiassaqartitsiviit akulikinnerpaamik saqqummiussisartut taamaattumillu tutsuiginassuseqassagunik naalakkersuinikkut tatineqanngissaminnik pisariaqartitsinerpaaq siulersuisut siulittaasuattut akisussaaffigilerpat. Qanoq taakku oqimaaqatigiissisinnaavigit.
Tassunga tunngatillugu siulersuisunut siulittaasunngorlaap oqaatigaa ulluinnarni aqutsisut tamassuma angunissaa akisussaafigigaa.
Frederik Lund 1996-imi tusagassiortunngorpoq, Atuagagdliutit-ni, Radioaviisimi Qanoruumilu tusagassiortutut ilaatigullu Qanoruumi aaqqissuisutut paarlatsitut sulilluni. Tusagassiorneq tutsuiginartoq qanoq sinaakutsersussaviuk?
Tassunga tunngatillugu siulittaasungorlaaq oqarpoq taamak sukumiitigisumik oqaaseqarsinnaannani siulersuisoqatinili isumasioqatigeqqaarniarlugit.
KNR tassaaginnanngilaq nutaarsiassaqartitsivik, tassami ukiut 50-it matuma siorna aallartikkamili aliikkutassaqartitsivik Kalaallit Nunaata Radioani qitiulluinnarpoq, siunissaa qanormita takorloorneqarpa?
Tassunga tunngatillugu Frederik Lund oqarpoq siulersuisoqatini isumasioqatigeqqaarniarlugit aammalu susoqarpiarneranik paasisaqaqqaarluni isummerumaarluni.
Frederik Lund februaarip naggataani namminersortutut sulilerpoq.
