Allanik tunillatsittoqarsimanngitsoq
Corona virusimik tunillatsissimasinnaasunik misiligutinik 37-nik Peqqinissaqarfik sapaammi apriilip ulluisa tallimaanni tigusaqarput, tamarmillu tunillatsissimanngitsut Naalakkersuisut tusagassiuutinut nalunaauteqarlutik taama allapput.
Naalakkersuisut tusagassiuutinut nalunaarutaat napertorlugu apriilip ulluisa sisamaat tikillugu inuit 662-it misissugassanik tigusiffigineqarput, taakkunanilu aqqanillit tunillatsissimapput maannakkullu misissugassat 25-t inerneri utaqqineqarput.
Tunillatsissimasunit sisamat peqqissisutut nalunaarutigineqarput, sinnerilu peqqissingajalerlutik.
Covis-19-imik napparsimalersussanut katsorsarneqartariaqartunullu isumaginnilluarniarluni maanna peqqinnissaqarfik piareersaleruttorpoq. Piareersarnerit nukinnik atuiffiupput, taamaattoq peqqinnissaqarfik amerlanertigut nalinginnaasumik ingerlavoq. Perulullutik napparsimasut piaartumillu suliarisariaqakkat nalinginnaasumik misissorneqarlutillu katsorsarneqarsinnaapput.
Naak maannakkut ulapiffiugaluartoq inuit kikkulluunniit arlaannik perulunnartumik nappaateqarsorisut peqqinnissaqarfimmut misissortinnissaq katsorsartinnissarlu siunertaralugit saaffiginneqquneqarput. Ulluni makkunani pisut nappaatip allap pisariaqarfiatigut suliarineqarnissaanik kinguneqassanngillat. Maannakkut Covid-19 sammineqartupilussuuvoq, nappaatilli allat tamatuma unitsinnavianngilai taakkulu tamanna pillugu puigorneqassanngillat, Namminersorlutik Oqartussat allapput.
