Allamiut aviisii naqerlaat Nuummi pisiassaalissapput
Printeri immikkorluinnaq ittoq nutaaq, Tele Postip pissarsiarisimasaa atorlugu aviisit nunanit assigiinngitsunit arfineq-pingasuneersut 33-t pisartagarineqalersinnaanngorput, soorlu Danmarkimiit Jyllands-Posten, Politiken, BT aamma Ekstrabladet.
Aviisit Nunatsinnut nalinginnaasumik timmisartumik tikiunneqartaraluarput, printerili aviisinik anillatsitsisinnaasoq Tele Postimit pissarsiarineqariarmat aviisit nunanit saqqummerfiiniit tassa maanna anillatsinneqarsinnaanngorput.
Aviisip ullormut saqqummersup ullaarnganiit pissarsiarineqarsinnaanngornerata saniatigut silaannakkut assartorneranut aningaasartuutit aamma sipaarneqarsinnaanngussapput, aviisillu oqimaaqisut timmisartoq atorlugu Kalaallit Nunaannukaattarnerat pisariaarutissammat, CO2-mik aniatitsineq aamma annikillissaaq.
Aaqqissuussinerli Nuummiinnaq atorallarpoq. Printerertaaq aviisit nunarsuatsinni aaqqissuisoqarfiinut attaveqarpoq, aviisillu Nuummi TELE-POST Centerimi printerikkut anillatsinneqartassapput.
Aviisit pappiarakunit pappiaralianit 100 procentimik suliarineqartassapput, TelePost Cenrimilu Nuummi, Nuummilu pisiniarfinni arlalinni ullumikkumiit pisiarineqarsinnaanngussapput.
