Politikki

Allakkat ernumalersitsisut

Isumaginninnermi suliat pillugit Ilisimatusarfimmi ilinniarfimmi ilinnartitsisup Steven Arnfjordip pisortat allagaataannik takunnikkumanermi atuakkat imaat ernumalersitsisutut taassallugit nangaanngilaq.

Allattoq Charlotte Holten-Møller, Jens Thorin

juulip 29-at 2016 13:32

- Atuakkat ernumalersitsipput. Atuakkakka Kommune Kujalliup isumaginninnikkut immikkoortortaata aaqqissuussaannginneranik, uppernarsaasersuisimanngineranik arlaleriarlunilu akisussaassuseqanngutsutut iliuuseqarsimaneranik ersersitsipput, Arnfjord KNR-imut oqarpoq.

Meeqqat angerlarsimaffiup avataani inissinneqartut eqqugaaqsut

Akisussaassuseqannginnermik oqaaseqarnera ingammik meeqqat angerlarsimaffiup avataanut inissinneqarsimasut pillugit sulianut 31-nut tunngavoq, allaffissornermi periaatsitut nalinginnaalluinnartut atorunnaarsinneqarsimallutik.

Aamma suliat 13-nit isumaginninermi naalakkersuisoqarfiup suliatut ernumalersitseqisutut" taasimavai.

Aamma atuaruk Innuttaasut inatsisitigut isumannaassusaat aarlerinartoq

Tassami suliaq kisitsisinuinnaq naatsorsueqqissaarnerinnarmullu tunnganngilaq. Kisitsisit tunuanni ilaqutareeqarpoq meeqqanillu atugarliortoqarluni, taavalu inatsit malinneqarsimanani, Steven Arnfjord nangippoq:

- Tassami meeqqap angerlarsimaffiup avataanut inissinneqarnerluni, qanoq sivisutigisumik inissinneqarsimassanerluni qaqugulu angerlarumaarsinnaanerluni paasissallugu pisinnaatitaaffigaa.

Meeqqat pillugit isumaqatigiissut malinneqarsimanngitsoq

Taava aamma Steven Arnfjordip maluginiarpaa, kommunip meeqqat pillugit FN-imi isumaqatigiissut arlalitsigut malissimanngikkaa.

Naak borgmesterip Namminersorlutik Oqartussanut ikioqqulluni saaffiginninnera Steven Arnfjordip isumaginninnermik sulialittut isigalugu inerisimassusermut ersiutaatikkaluarlugu, Jørgen Wæver Johansen politikkikkullu siuttut allat siusinnerusukkut iliuuseqarsimanngimmata tupigusuutigaa:

- Taakkua inatsisit malinneqarnissaasa qulakkeerneqarnissaannut akisussaasuunerpaapput. Isumaginninnermi immikkoortortaqarfimmik qullersaqanngitsumik ingerlatsisoqarsinaanngilaq, kommunilu isumagininnermi pisortamik arlaleriaqaluni taarsiisarpoq, taamaanneralu suliassaqarfiup qanoq ingerlanneqarnissaanut suliallu qanoq aaqqiissuunneqarneranut kinguneqarpoq. Taamaammallu tamatumani sukaterisariaqarput, Ilisimatusarfimmi ilinniartitsisoq, Steven Arnfjord, oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.