Allakkat allagartallu Savalimmiunut pingaarutilissuit akitsorterussinikkut tuniniarneqassamaalerput

Oqaatsinut piorsarsimassutsimullu qaammarsaasinnaaneq pillugu manna tikillugu ukiorpaalunni toqqortaasimasut Savalimmiuni nassaarineqarput, akitsorterussinikkullu tuniniarneqartussanngorlutik.

Taakku taaguuteqartinneqarput ”Evensenip Toqqortaatai” – ”Evensen-Arkiv”. Allakkat allagartallu uppernarsaatit tusintillit arlalissuit akitsorterussinikkut tuniniarneqassamaalerput, Københavnimi Bruun Rasmussenip Eqqumiitsulianik akitsorterussisarfiani. Akitsorterussineq novemberip naalernerani pissaaq.

- Toqqortaatit Savalimmiuni Danmarkimilumi piorsarsimassutsimut kingornussatigut pingaarutilerujussuupput, savalimmiormiunullu ilisimatusartunut nalilerujussuullutik. Mianersortunnguamik 250.000 koruuninik nalilerpavut, attaveqarnermut Bruun Rasmussenip Akitsorterussisarfiani pisortaq, Sebastian Hauge Lerche oqarpoq.

A.C.Evensen 1870-imiit 1917 tikillugu inuuvoq, taanna savalimmiormiuuvoq oqaasilerituujuvoq palasiullunilu, naallu inuunikikkaluaqaluni atuakkiortarnermigut, oqallitsitsisarnermigut politikeritullu Savalimmiut oqaluttuassartaat sunniuteqarfigisorujussuuvaa. Evensenip 1800-ikkut naalerneranni inuusuttuunera savalimmiormiutut misigissusaa sakkortusiartorsimaqaaq, ilinniagaqarniarlunilu Københavnimut atuariartorami ilinniarnertuut akornanni savalimmiormiuussutsini nittarsaalluartarsimavaa.

Savalimmiormiut Danmarkimi ilinniarnertuut kattuffiliorput, kattuffiup anguniagaa tassaalluni ”savalimmiormiutut oqaatsit ataqqineqarlik - savalimmiormiullu ataqatigiillik, taamaalillutik nammineersinnaalerniassagamik.”

Savalimmiuni meeqqat atuarfiini ilinniutit siulliit Evensenip suliarisimavai, tamannalu Savalimmiuni massakkut tusaamasaassutigaa.