Allakkanik marlunnik qaartartumeerisoqarpoq
Italiami nunat allat aallartitaqarfiini marlunni poortukkat qaartartunik imallit marluk, Italiami illoqarfiit pingaarnersaanni Ruumami ippassaq qaartinneqareersullu, politiit upalungaarsimanissaq ulapputigisorujussuanngorpaat.
Allattoq Elisa Isaksen
decembarip 24-at 2010 16:53
Nunat allat aallartitaqarfiini, naalakkersuisut allaffeqarfiini, allakkerisarfinni inatsisartunilu sillimaniarneq sakkortusineqartoq, oqartussanit oqaatigineqarpoq.
Poortukkani qaartinneqartuni siulleq Chilep aallartitaqarfiani qaarmat, sulisut ilaat angisuumik ajoquserneqarpoq aamma poortugaq alla Schweizip aallartitaqarfiani qaarmat inuk ataaseq ikiligaavoq.
Qaartartut taakku marluk videop kassettiinut poorneqarsimapput allakkatullu nassiussaallutik.
Inatsisaatsuuniat suleqatigiit, imminnut Federatione Anarchia Informale-mik taagortut qaartartumeerinernut taakkununnga marlunnut akisussaallutik nalunaarput.
Inatsisaatsuuniat suleqatigiit nalunaarutaat, qaartartup aappaata qaarfiata eqqaani karseeqqami nassaarineqarpoq.
