Allaffeqarfik nersornaaserneqartussatut innersuunneqarpoq
Nersornaat tunniunneqartarpoq suliniaqatigiiffimmut nunani avannarlerni angalanermi misigisassanut immikkut iliuuseqartartumut.
Ilulissat Kangiata allaffeqarfia Qaasuitsup Kommunianut ilaavoq, Ilulissanilu kommunip allaffiani inissisimalluni. Ilulissat kangiat, UNESCO-mit nunarsuaq tamakkerlugu eqqissisimatitassatut 2004-mi kingornussassanngortinneqartoq, Allaffeqarfimmit Namminersorlutik Oqartussat aamma Danmarkimi kulturikkut kingornussanut aqutsisoqarfik suleqatigalugit nakkutigineqarpoq.
Kangiata allaffeqarfianit 2008-mili aallartinnerminit immikkut sulissutigineqarsimapput immikkoortut marluk: Amerlasuunik tikinneqarsinnaasunngorlugu, aammalu nunarsuaq tamakkerlugu kingornussaq pillugu paasissutissat pitsanngorsarneqarnerat.
Assersuutigalugu Kangiata allaffeqarfiata, ilaatigut inuit aqqutaat, Sermermiut aqqutigalugit suliaritissimavaa, nunarsuaq tamakkerlugu kingornussami qimmussit aqqutaat pitsanngorsarneqarsimapput, nittartakkamik pilersitsisoqarsimavoq, allagartaliortoqarluni aammalu Kangia pillugu filmiliortoqarluni. Suliat amerlanerit aningaasaateqarfinnut qinnuteqartarnermi aningaasalersorneqarsimapput.
Kangiata allaffeqarfia pingasunik sulisoqarpoq; site manageri ataaseq, attaveqaqatigiinnermut ataqatigiissaarisoq ataaseq aamma park rangeri.
Akissarsisitsineq 350.000 koruuninik nalilik Finlandimi illoqarfimmi Helsinki-mi maajip 25-anni pissaaq.
