Aligoqqik 50 millioni koruunilersillugu tunineqarpoq

Aligoqqik tungutsuaarik Schweitzimi illoqarfimmi Genevemi akitsorterunneqarmat pissanngattoqarpoq. Aligoqqiit tungutsuaariit qaqutigorsuaq nassaarineqartarput.

Aligoqqik tungutsuaarik akitsorterussaq Sydafrikami siorna nassaarineqartoq sapaatip akunnerini aqqanilinni maanna ilusissaatut isikkulerlugu 1 koruunitut angitigilersillugu silisisup suliarisimavaa.

Silisisuatalu inuulillaramili aatsaat taama kusanartigisumik silisisimanerarpoq.

Nunarsuarli tamaat aningaasarliorneqalermat qularineqaleraluarpoq nalerpiaatut akilersillugu tunineqarsinnaanera.

Akitsorserussinermili qularneq suujunnaarsinneqarpoq, aligoqqik tungujortoq 10,5 million Schweitzer francilersillugu, kooruuninngorlugu 50 millionit sinnerlugit akilersillugu tunineqarmat. Akitsorterussinerni tamani uuttuutai aallaavigalugit tunisineq akisunerpaavoq, akimigullu rekordiliisimalluni.

Londonimi ujaqqanik erlinnartunik akitsorterivissuup Sotheby's-ip pisortaata David Bennettip oqaatigaa uppernarsineqaannartoq erlinnartuutit suugaluartulluunniit aningaasarliortoqaraluartorluunniit tunineqarsinnaajuaannarneri.

Aligoqqimmik tungutsuaarimmik immikkuullarilluinnartumik pisisoq kinaanerminik oqaatiginnikkusussimanngilaq, aligoqqiulli taaguusernissaa aalajangersinnaalerlugu.