Canadamiut aatsitassarsioqatigiiffiat True North Gems Qeqertarsuatsiaat eqqaani Aappaluttup qanittuani aligoqqiit atortussiassaliat atorlugit qillerummik atortulerlutik qillerileruttorput.
Aatsitassarsioqatigiiffik tusagassiuutinut taama nalunaaruteqarpoq.
Pinnersaasiassanik rubininik piiaanissamut atatillugu Qeqertarsuatsiaat eqqaani qillerisoqarpoq, nunami 110 kvadratkilometer-inik annertussusilimmi.
Rubininik ujarlernermi True North Gems nunap iluani arlalippassuarnik qillerisussaavoq, qillerneqartussallu katillutik 5000 meter-inik takissuseqassapput.
Aappaluttup eqqaa qilleriffigineqarnerpaajussaaq, tamanna rubineqarnissaa aatsitassarsiorfimmit ilimagineqarnerummat.
Rubininik nassaassarsiornerup saniatigut, True North Gems, ujaqqanik piiakkanik misissuissaaq, Qeqertarsuatsiaallu eqqaata nunap assiliornissaa pilersaarutigineqarluni.