Alianartumik pisoqaqqissinnaanera najugaqartut ernummatigaat
-Tassa isumaqarpugut inuit navianartorsiornerat, soorlu ikuallanneq kingulleq eqqarsaatigalugu. Aniffissaarunneq taanna malunnarami. Isumannaannerusuuppat immaqa ajunaarneq pisimassanngikkaluarpoq, Ilulissani ineqartut peqatigiiffianni siulittaasoq, Kalaallit Nunaannilu ineqartut kattuffianni siulersuisuni ilaasortaq, Jakob Schultz oqarpoq.
Ineqartut nuna tamakkerlugu kattuffianni tamanna oqaluuserisassanngortinniarpaa. Taassuma saniatigut Namminersorlutik Oqartussat aamma kommuuni saaffigineqartariaqartut oqaatigaa.
- Ajornartorsiut sukumiisumi misissorneqartariaqarpoq taavalu pitsaanerusumik qimaaffissiat qanoq inissitsitsernissaat aamma suliarineqartariaqarluni, Jakob Schultz oqarpoq.
Ikuallattoqarnerani paasiniaaqqissaartartut Ilulissaniipput tallimanngormat ikuallanneq angutip 46-nik ukiullip ajunaarneranik kinguneqartoq sumik aallartissimanersoq misissoriartorlugu.