Algierimi toqutaasut 62-nngorput
Algeriiap illoqarfiisa pingaarnersaanni, Algierimi, marloriarluni qaartartunik qaartoqarmat inuit ikinnerpaamik 62-it ullumikkut toqutaapput. Naalagaaffiit Peqatigiit allaffeqarfianni sulisut qulit toqutaasunut ilaapput. UNHCR-imi oqaaseqartartoq nutaarsiassaqartitsivimmut AP-mut taama ilisimatitsivoq.
Qaartartoq siulleq meeqqat atuartut bussianni nunami eqqartuussiviit qullersaata siorngatungaani qaarpoq, qaartartullu aappaa illoqarfimmi Algierimi pigissaartut najugaqarfiginerusaanni Naalagaaffiit Peqatigiit allaffeqarfiata ungasinngitsuani qaarluni.
Eqqartuussiviit qullersaata eqqaani nunamilu naalakkersuinikkut siunnersuisartut allaffeqarfiata eqqaani aqquserngit ingerlaannaq assersorneqarput.
Qaartartumeerinerit kimilluunniit akisussaaffigineqarusunngillat, qunutitsillutilli saassussisaqattaartartunut al-Qaedakkunnut attuumassutillit ukioq manna siusinnerusukkut qaartumeerinernut akisussaasuullutik nassuerutiginikuuvaat.