Algeriami suli eqqissiviilliorput
Nunami aqutsisut aamma nunap aqunneqarneranik allanngortitserusuttut arfininngorpat, illoqarfiit pingaarnersaanni Algier-imi akerliussutsimik takutitsilerpata kikkut pissaaneqarnerunerat takuneqarsinnaassaaq. Akerliuniarfigineqartussammi tassaapput nunami tassani naalakkersuinikkut ingerlatsisut nutaaliorsinnaanngitsut, innuttaasut 34 millioniusut, ukiuni qulikkaartuni arlalinni naalakkersuisorisaat.
Nunap taassuma sanilerisaani Tunesiami, angut inuusuttoq pissutsinut akerliuniarluni, tassa suliffissaaleqineq, neriuutaarunneq politiillu akilersittartut peqqarniinnersuat akerliuniarfigalugit imminut kukummat, akerliuniarneq aallartinneqarpoq.
Algieriami maannamut taamatut assingusumik imminut ikuallattut 20-t missiliorpaat. Allaammi sapaatiummat illoqarfinni assigiinngitsuni pingasuni pingasut imminnut ikuallariartut, Spaniamiut aviisianni El Pais-imi allaaserineqarpoq.
Nunami tassani aqutsisut Tunesiamisut Igitsinimisullu akerliuniarluni perulluliortoqarnissaa ernummatigaat. Tassami aamma Algeriami inuusuttut ilinniagaqarsimasut suliffissaqanngitsut millionilikkaat sakkutuujummata, siunissaqanngitsutullu misigisimammamata.
Illuatungiliuttut illoqarfiit pingaarnersaanni januaarip 22-anni akerliussutsimik takutitseqqaarnialermata, kisermaassillutik naalakkersuisut politiinik isumannaatsuunissamillu isumaginnittunik 15.000-inik piareersimatitsipput. Aamma akerliussutsimik takutitsisut illoqarfimmi arfininngorpat ingerlaaqatigiinnissaat, nunami tassani oqartussat itigartitsissutigisimavaat.
Akerliussutsimik takutitsiniartut illoqarfimmi arsaattarfimmiissinnaasut oqartussanit oqaatigineqaraluarpoq, tamannali iluarsaaqqinnissamik suliniuteqartunit akueriumaneqannilaq, taamaattumillu arfininngorpat aporaattoqarnissaa ernummatigineqalerluni.
