Algeriami innuttaasut præsidentertik aamma tunuaqqulerpaat
Afrikap avannaani nunami allami Algeriami akerliussutsimik takutitseqqusaannginneq qatangiinnarlugu Algeriap illoqarfittut pingaarnersaanni Algierimi, ullumi akerliussutsimik takutitsisoqarpoq.
Allattoq Apollo Jeremiassen
Akerliussutsimik takutitsisut piumasaraat nunaminni demokratiip eqqunneqarnissaa aammalu præsidentip tunuarnissaa. BBC-ip nalunaarutaa malillugu akerliussutsimik takutitsisut 200-t missaanniittut politiinit 30.000-it missaanniittunit assersorneqarput.
1992-imili sukannersumik naalakkersuineq Algeriami atuutilerpoq, tamannarpiarlu pissutaasimagunarluni akerliussutsimik takutitsisut ikittuinnaapput. Taakku piumasaraat Algeriap præsidentiata, Abdelaziz Bouteflika-p tunuarnissaa.
Ingerlaaqatigiit ilaasa aviisit nassarpaat allassimasut "Mubarak uppisinneqarpoq".