Algeriami aamma eqqissiviilliortoqalerpoq
Angut inuusuttoq Algeriamiu imminut ikuallappoq, taamaaliorpoq suliffissaminik aamma inissaminik oqartussanut qinnuteqaraluarnermi kingorna. Angutip taassuma uutiternini kingusinnerusukkut toqqutigai.
Taamatorpiarlu pisoqarneratigut Tunesiami eqqissiviilliornerit aallartipput.
Inuussutissat akiisa qaffariapiloorneri aamma suliffissaaleqineq pissutigalugit,
Algeriiami illoqarfinni arlalinni sapaatip akunnerini kingullerni marlussunni akerliussutsimik takutitsisoqattaartoqarpoq, tamannalu inuit marluk inuunerannik naleqarpoq.
Sukkunut nerisassiornermilu uuliamut akigititat Afrikap avannaani nunani arlalinni aamma Kangia Qiterlermi qaffanneqarmata akerliussutsimik takutitsisarnerit aallartipput.
Tunesiami tillinniat eqqissiviilliortullu ippassaq amerlasimaqaat, ullumili eqqissisimaneqarnerulluni. Eqqissiviilliornerit aallartimmatali Tunesiamiut 60-it inuunerminnik annaasaqarsimapput.
Tunesiap præsidentia, Zine el-Abidine Ben Ali, Saudi-Arabiamut tallimanngormat qimaammalli, kina nunami aquttunngussanersoq nalornissutigineqarpoq. Tunesiamili naalakkersuinikkut aaqqissuussisut maanna aalajangerpaat, Inatsisartut siulittaasuat, Foued Mbazaa utaqqiisaasumik præsidentiugallassasoq.