Alfred Jakobsen: - Aalajangertinnata eqqarsarluaqqaartariaqarpugut

Taamatuttaaq kommunerujussuanngornissamut pilersaarusiortoqaleruttorluni, tamakku pillugit ilisimatuut, qinikkat atorfillillu tamarmik katillugit 80-t Nuummi Katuami ippassaq ullumilu isumasioqatigiipput.

- Nunarput ataatsimut tamaat qiviarutsigu ullumikkorpiaq taamak amerlatigaluta aammalu inuiaqatigiinni taakkuinnaalluta unamminartut taamak amerlatigisut ataatsimoortillugit tamaasa ingerlassinnaavagut? Tassalu taanna apeqqut pingaaruteqartorujussuaq akissuserniartariaqagak, taama oqarpoq Avatangiisinut pinngortitamullu pisortaqarfimmi pisortaq Alfred Jakobsen oqarpoq.

Taanna nangilluni nassuiaavoq qanorluunniit pitsaatigisumik pilersaarusiortigigaluarunik pinngitsooratik avataaniit pisariaqartinneqartunik tikisitsisarnissaq pisariaqartinneqartassasoq.

- Assersuutigalugu sulisussanik tikisitsineq. Taamaattumik pilersaarusiorneq ataatsimut qiviarutsigu inuiaqatigiit pinngitsoorata tusarniartariaqarpavut. Aperaluta pilersaarut una ima ittoq qanorpiaq isumaqarfigaajuk?, Alfred Jakobsen oqarpoq.

Taanna qalleqqissaalluni assersuusiornermini Aluminiuliorfissamik pilersitsiniarneq eqqaavaa.

- Aluminiuliorfissamik pilersitsisoqassappat taava aatsitsivik illoqarfiup eqqannguaniittariaqarpa imaluunniit illoqarfimmiit ungasissumut inissinneqassava? Gassi aniasussaq tassanngaanneersoq akuerissavarput imaluunniit naamik? Soorlu tamakku inuiaqatigiinniit isummerfigineqarnissaat pisariaqarpoq, oqarpoq.

Nangipporlu:

- Tamannalu pisariaqarpoq pissutigalugu Inatsisartut Naalakkersuisullu aalajangernissaat taamaalilluni oqinnerusinnaaniassammat, taama oqarpoq Avatangiisinut pinngortitamullu pisortaqarfimmi pisortaq Alfred Jakobsen.

Taanna aamma oqarpoq uuliamik assigisaannillu misissuinermi inatsit pisariinnerusoq pisariaqartinneqartoq.