Aleqap Issittumi Siunnersuisooqatigiinnut peqataajumajunnaarnini sunnguamilluunniit pissarsiaqarfiginngilaa
Peqataajumajunnaarnermi pissutigerpiarlugu Canadamiut 2015-ip tungaanut siulittaasuutitaqartuusut naammassiinnagassat malittarisassallu sukatersimavaat. Allagaqaammi AG-p pissarsiarisimasaani suleriaatsit malinneqartussat tamaasa allaaserineqarput.
Siulittaasuutitaqartullu atorfilittaasa qullersaat Patrick Borbay naapertorlugu, siunnersuisooqatigiit ataatsimiinnerinut atatillugu nunarput erfalasuleqqusaajunnaarpoq.
- Erfalasulertoqartillugu naalagaaffiit issittumiittut nunallu ataavartumik peqataasut kisimik erfalasuleqqusaapput, aamma nunat taakku erfalasui kisiisa Issittumi Siunnersuisooqatigiit nittartagaanni atorneqaqqusaapput. Tamanna aamma siunnersuisooqatigiit ataatsimiinnerini atit allagartaannut atuuppoq. Tassani taamaallat Danmark allassimassaaq Kalaallit Nunaallu allaqqanani.
Peqataajumajunnaarnerup kingunerisaanik Nunarput taamaalilluni sanngiinnerusumik inissisimalerpoq.
- Taakkorpiaappullu Aleqa Hammondip peqataajumajunnaarnermigut angusai. Siulittaasuutitaqartut malittarisassanik sukaterinissaannut pinngitsaalisimavai, naak tamakku siornatigut annertuuliuutigineqarneq ajoraluartut, IA-p siulittaasua Kuupik Kleist AG-mut oqarpoq.
Peqatigisaanillu aamma Aleqa Hammondip § 37 naapertorlugu apeqqummut akissuteqarluni qanittukkut nassuerutigaa Issittumi Siunnersuisooqatigiinni ataatsimiinnerni kikkut siunissami qanoq inissaqartinnissaat pillugu Danmarkimut Savalimmiunullu allakkatigut isumaqatigiissutigineqarsimanngitsoq.
