Aleqap aningaasivini aagaa qimarratigineqarpoq
”Maligassiuisoq?” aamma ”Aleqap taxamut akiligassaq akilinngilaa” qulequtsiullugit, Aningaasaqarnermut Nunanullu allanut tunngasunut naalakkersuisup Aleqa Hammondip taxamut akiligassaq akilerusussimanngikkaa, Sermitsiami tallimanngormat saqqummersumi allaaserinnittoqarpoq.
Aleqa Hammond akiliiumasimanngimmat taxartitsisup politiinut tunniussimagaa allaaserineqarpoq, tamannali ilumoorpa?
Nuummi politiit pisortaat Bent Heiselberg ullumi oqaloqatigaarput. Taanna oqarpoq pisimasoq pillugu suliaq naammassineqareersoq, pineqartullu aaqqiagiinngissutertik namminneerlutik aaqqissajunnarsigaat, erseqqissaatigalugulu Aleqa Hammondip akiligassani akilereeraa.
Taxartitsisut pisortaat Joe Seidsen Radioaviisimut oqarpoq annerusumik pisoqanngitsoq, akiligassarlu qangali akilerneqareersoq.
Seidsen Sermitsiamut tallimanngormat saqqummersumut ima oqarpoq, issuaaneq aallartippoq: “Susoqarnikuunngilaq. Tamarmik paasinerluinerupput. Aleqa Hammondimuna aningaasivini puigorsimagamiuk akiliisinnaasimanngitsoq. Taamaattumillu kingusinnerusukkut akiliinissaa taxartitsisorlu isumaqatigiissutigisimavaat”, Joe Seidsen oqarpoq. Issuaaneq naavoq.
Taava taxartitsisoq unnerluusserusuppallaarsimanersoq apeqqutaalerpoq, imaluunniit Sermitsiaq tunngavilersorluagaanngitsumik oqaluttualiorniarsimanersoq.
