Aleqa naalakkersuisunut siulittaasunngorusuppoq
Siumut partiiat nuna tamakkerlugu siorna ataatsimeersuartitsimmat Aleqa Hammond siulittaasunngornissaminut Hans Enoksen unammilleraluarpaa. Siumup ilaasortai taasisinneqarmata Hans Enoksen 200-nik amerlanerussuteqarluni partiimut siulittaasunngoqqippoq. Kisianni Aleqa Hammond isumaqarpoq, nammineq Naalakkersuisut siunniussaat anguniassallugit pitsaanerussallunni.
- Isumaliutersuutiga aallaaveqarpoq HS Analysep misissuisitsinerani paasineqarmat Siumumik taasisussat arlalialuit tikkuarsimagaannga naalakkersuisut siulittaasussaattut piukkullunga.
- Naalakkersuisut siulittaasuata pingaarnerpaatut suliassarivaa naalakkersuisoqarfiit ataatsimoortumik toqqissisimanartumik suleqatigiinnissaat qulakkiissallugu, tassaassaarlu oqariartuutima pingaarnerpaat.
ASeqa Hammond oqarpoq siulittaasutut unammillernini Hans Enoksenimut isornartorsiutaanngitsoq.
- isumaliutersuutigaakka naalakkersuisut siulittaasuattut suliassat pingaarnerpaat inuiaqatigiinni ersiutaasussaq tassaassasoq naalakkersuisoqatigiit akimorlugit ersarissumik ataqatigiisitsisumik ingerlatsisoqassasoq
Aningaasaqarnermut naalakkersuisutut tunuarputit isummatit naalakkersuisuni ersarissumik apuussinnaanagit misigisimagavit
- Pingaaruteqarpoq naalakkersuisooqatigiit arlaannaalluunniit tusaannginneqarnerunanilu tusaaniarnerusariaqarnera, naligiimmik pingaartinneqarlutik isigisariaqarput, naalakkersuisoqarfiit ataqatigiissumik toqqissisimanartumik ingerlaniassappata.
avissaartuunnermut ersiutaanngila partii ataaseq naalakkersuisut siulittaasussaannik marlunnik sassartitsippat?
- Isumaqarpunga partiimut nakuusumut ersiutaasoq pissutigalugu ataasiinnarmik sassartitaqartuaannartannginnatta, partiitsinni siulittaasoqarfiup tigunissaanut piareersimasoqartuaannarpoq, isumaqarpungalu taanna partiip peqqissup angusaqarusuttullu ersiutigigaa.
Ersiutaanngila partii ataatsiusutut saqqumminngitsoq ataasiusutut siuttoqanngitsutut?
- Ataatsimik siuttoqarpugut, naalakkersuisut siulittaasussaattut piukkunneqarnikuusimanera peqqutigalugu isumaliutersuutigaakka aammalu kina tassani issiassagaluarpamut isuma taakkununnga attuumassuteqarpoq, Aleqa Hammond naggasiivoq.