Aleqa: Kalaallit Nunaat uranimik annissuisinnaangajalerpoq

Islandip præsidentia Ólafur Ragnar Grímsson qaaqqusisoralugu politikkikkut oqalliffik Arctic Circle, Islandip illoqarfiisa pingaarnersaanni Reykjavikimi ullumi aallartinneqarpoq, uranimullu tunngasoq ilaatigut saqqummiunneqarluni.
Allattoq Mads Lynge
oktobarip 12-at 2013 14:11

Ataatsimeersuarneq ullaap tungaani ammarneqarmat, Naalakkersuisut siulittaasuat Aleqa Hammond pingarnertut oqalugiartunut ilaavoq.

Silap pissusiata allanngoriartornera, Aleqa Hammondip oqalugiarnermini ilaatigut sammivaa, silap pissusiata Issittumut sunniuteqaatai oqaluttuaralugit.

Aatsitassanut uranitalinnut attueqqusinnginnerup atorunnaarsinneqarnissaa Naalakkersuisut siulittaasuata aamma sammivaa, kigaatsumillu tuaviortoqarneranik oqariartuutini puigorsimagunarlugu. Uranitalinnimmi attueqqusinnginnerup atorunnaarsinneqarnissaa pillugu ilaatigut ima oqarpoq:

- Inatsisartut uranimut akuersaanngilluinnarnissamik politikkeqarnerup Kalaallit Nunaanni ukiup 25-it kingulliit atuussimasup atorunnaarsinneqarnissaa pillugu pingaaruteqartorujussuarmik oktobarip 24-anni aalajangiisussaassapput. Aalajangiineq taanna makkununnga aqqutissiuussisussaassaaq: - Kalaallit Nunaata aatsitassanik qaqutigoortunik piiaanissaanut, tassami taakkua amerlanertigut uranimut allanullu qinngornernut ulorianartunut attuumassuteqartarput. Aamma -Kalaallit Nunaat siunissami ungasissorsuunngitsumi annertoorujussuarmik uranimik avammut annissuisinnaalissasoq – ilimanarluni nunarsuarmi annersaasut 10-it akornaniilissasoq imaluunniit uranimik avammut annissuinermi annersaasut 5-it akornanniilissasoq ilimanarluni, Aleqa Hammondip ilaatigut taama oqarnera, Sara Olsvigip Inuit Ataqatigiit sinnerlugit Inatsisrtunut ilaasortap Facebookimi issuarpaa.

Aleqa Hammondillu taama oqarnera Sara Olsvigip eqqumiigivaa:

- Pissaanermik tigumminninnermini anneruniartutut pissusilersorpoq. Tassami siunnersuut una Inatsisartuni suliluunniit suliarineqarlunilu naammassineqanngilaq. Piviusuoq tassaavoq Inatsisartuni sisamanngormat suliarineqarmat, ataatsimiititaliamullu ingerlateqqinneqarluni. Ataatsimiititaliallu aalajangissavaa siunnersuut massakkut qanoq isikkoqassanersoq. Imaassinnaavoq allanngortinneqartoq kinguartinneqartorluunniit. Imaassinnaavoq imarisai qanorpiarlu isikkoqassanersoq iliuuseqarfigineqartoq. Taamaattumik nunat tamalaat akornanni, tusagassiortullu nunani tamalaaneersut peqataaffigisaanni taamatut nalunaaruteqartoqarnera assut eqqumiigaara, aamma isumaqarpunga takutikkaa Naalakkersuisut siulittaasuata Inatsisartuni suleriaaseq, Inatsisartullu oqartussaassusaat uani ataqqinngikkaa, Sara Olsvig oqarpoq.

Inuit 900-nit amerlanerusut, nunanilu tamaalaaneersut ataatsimeersuarnermut peqataasutut nalunaarsorneqarsimapput, nunat Issittuneersut arfineq-pingasut, nunallu allat 40-nit amerlanerusut, soorlu Kina, India, Tyskland, Brasilia, Korea Kujalleq aamma Singapore peqataatitaqarlutik.

Naalagaaffiit Peqatigiit qullersaat Ban Ki-moon, USA-p nunanut allanut tunngasunut ministererisimasaa Hillary Clinton, Naalagaaffillu Peqatigiit silap pissusia pillugu ataatsimiittartoqatigiivisa siulittaasuat Rajendra Pachauri, oqalugiartunut aamma ilaassapput.