Aleqa Ittuk angalaqqilerpoq
Ilaasartaat, Aleqa Ittuk, ippassaq unnukkut ikkarlittoq angalaqqilernissaminut piareerpoq, Aasianniillu Qeqertarsuarmukarluni ullaap-tungaalu nalunaaqutaq qulingiluap qeqqanut aallassaaq, Qeqertarsuarmiit Ilulissiassalluni. Ilulissanut unnugu nalunaaqutaq arfineq-marlup qeqqata missaani tikissangatinneqarpoq. Taama oqarpoq angalatitseqatigiiffimmi Disko Linemi pisortaq. Ole Dorph.
septembarip 04-at 2008 05:27
Ilaasartaat Qeqertarsuup Tunuani Kitsissuarsuit avataanni ippassaq unnulersoq arferngup missaani ikkarlippoq, Qeqertarsuarmiit Aasiaat tungaanut ingerlaartilluni. Ilaasut 15-20-t missaanniissimapput.
Ilaasut umiatsiaqqaanit takkussortunit Aasiannukaanneqarput. Aleqa Ittuk ajoqusersimanasoralugu misissorneqarpoq, Ole Dorphili ullaaq manna Radioavisimut oqarpoq, ajoqusersimanngimmat ullaaq-manna angalaqqilersinnaasoq.
Ole Dorphip erseqqissaatigaa ilaasut navianartorsiorsimanngitsut assullu eqqissimasimallutik.
-Taama pisoqaraangat soorunami tupannartarpoq. Ilaasulli nassuiaatipallappavut annilaangasariaqanngitsut, taamaammat uipallertoqanngilaq, Ole Dorph Radioavisimut oqarpoq.
