Aleqa: Inuit naleqassusaat pillugu isumalioqatigiissitaliorpugut

Kalaallit Nunaata saammaasseqatigiinnissaq pisariaqartinngilaa, inuilli imminut naleqartinnerat suliassat annerpaartarisariaqaraluarpaat, Inatsisartut siulittaasorisimasaat, Josef Motzfeldt oqallissaarummi, Danmarkimi Nunatsinnilu aviisinut nassiussamini ilaatigut taama allaaserisaqarpoq.

Kisianni inuit naleqassusiat - tassa taannaqqinnaajuvoq, isumalioqatigiissitaliornikkut sammineqartussaq, Naalakkersuisut siulittaasuat, Aleqa Hammond, ullumi akivoq.

Inatsisartut siulittaasorisimasaat Josef Motzfeldt, Inuit Ataqatigiit Radioaviisimit, ippassaq apersorneqarnermini ilaatigut ima oqarpoq.

- Malugineqanngitsoornavianngitsoq tassaavoq, Nunatsinni saammaasseqatigiinnissamut isumalioqatigiissitarsualiortoqarnissaanik Danmarkip tamanna peqataaffigerusunnagu oqaatigisareeraa, pisariaaruttutut tamanna isigigakku allaaserisaqarpunga.

Josef Motzfeldtip taama isummersornera pillugu, Naalakkersuisut siulittaasuat, Aleqa Hammond siullermik ima oqarpoq.

- Saammaasseqatigiinnissaq pillugu tassa sulivugut. Inuiaqatigiit kalaallit pillugit naalakkersuisoqarpugut aamma inuiaqatigiit pillugit pingaarnersiuivugut aammalu taakku pillugit sulisussaalluta. Danmarki piumanngimmat, saammaasseqatigiinnissamut isumalioqatigiissitaliornissarput unitsinnavianngilarput. Taama suleriuseqartoqarsinnaanngilaq, Naalakkersuisut siulittaasuat Aleqa Hammond oqarpoq.

Eqqumiitsuliornikkut piorsarsimassutsikkullu Nunatta ineriartortinneqarnissaa pingaartinnerusariaqartoq, Josef Motzfeldt isumaqarpoq. Taamaattumillu Saammaasseqatigiinnissamut Isumalioqatigiissitaq aningaasartuutaasariaqanngitsoq oqaatigalugu.

Tamanna pillugu Naalakkersuisut siulittaasuat ima qisuariarpoq.

- Namminersorlutik Oqartussaqarfiup eqqunneqarnera takuinnarluguluunniit, pingaaruteqarpoq eqqaamassallugu maannakkumut inuit tuusintilikkaat imminornikuusut. Taamaattumik inuiaqatigiinnitta oqaluttuarisaanera ataqqillugu, isumaqarpunga inuiattut ingerlariaqqinnissarput pingaaruteqartuusoq. Aamma isumaqarpunga, uagut inuiaqatigiittut immitsinnut kivinnissarput pingaarnerpaatittariaqaripput, taamaattumik Saammaasseqatigiinnissamut isumalioqatigiissitaliorniarpugut. Naalakkersuisut siulittaasuat, Aleqa Hammond oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat