Aleqa Inatsisartunut ilaasortani apeqqutissaqarnerpaavoq
Inatsisartut.gl-imi atuarneqarsinnaasut naapertorlugit ukiup aallartinneraniit ullumimut pargraf 36 naapertorlugu Inatsisartunut ilaaasortat Naalakkersuisunut allakkatigut apeqqutaat, 226-iupput.
Siumullu siulittasua, Aleqa Hammond, amerlanerpaanik apeqquteqarpoq. Tassa kisimiilluni apeqqutinik 40-nik nassiussisimavoq, taakkualu Inatsisartunut ilaasortat allakkatigut apeqqutaasa tallimararterutaat pallisimavaat.
Inatsisartunut ilaasortat apeqquteqarumanerpaat Siumup gruppianeersuupput, Karl Lyberth apeqquteqarnerpaamut tulliulluni, Malik Berthelsenilu pingajuulluni.
Tassalu tupaallaatissaanngilaq partiini tamani Siumut apeqqutinik amerlanerpaanik nassiussisuusimammat. Illuatungiliuttut partiivisa annersaat apeqqutinik 167-inik nassiussisimapput, apeqqutit nassiunneqartut sisamaagaangata pingasut Siumumit nassiunneqarsimasarlutik.
Partiini Demokraatit apeqquteqarusunnerpanut tulliupput, Atassutip Inuit Ataqatigiillu kingullernut tulliuneq avippaat. Kattuseqatigiit Partiiat apeqqutinik nassiussakinnerpaalllutik. Kisianni immaqa taakkua Inatsisartuni ataasiinnarmik ilaasortaatitaqarnerat nassuiaatissaalluarpoq.
Taamaammallu partiit Inatsisartuni ilaasortaatitaqassusiat naapertorlugu, qanoq apererusutsiginerat misissoraanni aamma ersiutit allanngorput.
Tamattumani Siumut aamma siuttuuvoq - agguaqatigiisitsigaanni ilasortat Siumumeersut apeqqutinik ukioq manna 14-inik nassiussisimapput. Tamatumanili Inuit Ataqatigiit kingullikunngorput, partiip ilaasortaatitai agguaqatigiisillugu ukioq mannna aappaa affarmik apeqquteqarsimammata.
Taamaannallu kisitseriaaseqaraanni Atassutip Demokraatit qaangerpaat. Taamaattorli Demokraatit Kattusseqatigiit Partiiannit apeqquteqarnerusimapput.
Naalakkersuisut siulittaasuata Inatsisartullu siulittaasuata saniatigut Inatsisartunut ilaasortat pingasut ataasiaannarlutilluunniit apeqquteqarsimanngillat. Taakkua tassaapput Inuit Ataqatigiinneersut Kaali Olsen, Hans Aronsen aamma Aqqaluaq B. Egede.
Kisianni imaalluarsinnaavoq, taakkua Inatsisartut Ataatsimiittarfianni Akunnermi apeqquteqartarfimmi Naalakkersuisunut toqqaannartumik apeqquteqartarsimasut.
