Aleqa Hammondip tunuarnera Hans Enoksen-ip ajuusaarutigaa

Aningaasanut nunanullu allanut naalakkersuisup Aleqa Hammondip tunuarnera Naalakkersuisut siulittaasuata Hans Enoksenip ataqqivaa akueralugulu.

Kisianni aningaasanut inatsisissatut siunnersuut nammineq siuttuuffigalugul siunnersuusioraa, aalajangiusimavaa. Soorluttaaq killissaa tikillugu Naalakkersuisut tamarmik illersoraat, oqaatigigaa.

- Kisianni uani pissutaanerpaagunarpoq, Nukissiorfinnut aktieselskabinngunngitsoornera, aningaasanik attartornissaq. Taanna soorunami Naalakkersuisunut annertuumik eqqarsartitsivoq, tupiginngilaralu Aleqa Hammondip tunuarnerminut taanna pissutigissappagu, naalakkersuisut siulittaasuat oqarpoq.

Aningaasanut naalakkersuisoq oqarpoq, apriilimili mianersoqqusisimalluni, Nukissiorfiit aktieselskabinngunngippata, aningaasanut inatsisissaq ajalasuussasoq.

- Soorunami naalagaasuugutta ingerlaannaq aktieselskabinngortissinnaagaluarparput. Kisianni Inatsisartuni allanik suleqateqarpugut, taakkualu aamma naaperiarnissaat pingaartorujussuuvoq, soorluttaaq kommunerujussuit, SIK kattuffiillu allat oqariartuutaat aamma pingaaruteqartut, Naalakkersuisut siulittasuat Hans Enoksen oqarpoq.

Hans Enoksen-ip piffissami tulliuttumi aningaasanut nunanullu allanut naalakkersuisoqarfiit tigumiassavai.