Aleqa Hammondip naalakkersuisut isornartorsiorpai
- Ukiut 2004-miit 2008-mut tassaapput inuiaqatigiinni namminersortunngorsaanissami namminerlu aamma suliffeqarfiutinik pilersitsinissamik ukiut sanaartorfiunerpaasimasut. Inissianik aamma sanaartorfiunerpaapput, innuttaasullu namminneq akileeqataallutik illussaminnik ukiuni taakkunani sanaartortitsipput. Ilinniartitaanernullu aningaasaliissutit ukiuni taakkunani aamma amerlanerpaapput, Aleqa Hammond oqarpoq.
Erngup nukinga atorlugu nukissiorfinnut taamanikkut aningaasaliisoqangaatsiarnera siunissaq ungasinnerusoq isigalugu isumatusaarnerusoq Siumup siulittasuata oqaatigaa, naalakkersuisoqatigiinnerminni nunatta nunanut allanut akiitsoqarsimanginnera nunattalu karsiata 2 milliardit koruuninik imaqarnera tikkuarlugu.
- Maanna naalakkersuisut pingaarnertut oqariartuutaat tassaavoq nunanut allanut akiitsugassatsinnik aningaasanik atorniartariaqartugut. Tamanna apeqquserneqartariaqarpoq, Aleqa Hammond oqarpoq.
Naalakkersuisoqatigiinnikut Nunatta akiitsoqarneranut akisussaaqataasimannginnersut Aleqa Hammond aperaarput, akivorlu:
- Siumukkut Atassutikkullu kisimiillutik naalakkersuisoqataanngisaannarmata. Inuit Ataqatigiit Atassut aamma Siumut paarlakaajaallutik naalakkersuisoqatigiittarsimapput. Tamatta pisussaaffeqarpugut, inuiaqatigiillu tamarmik akiitsoqarnerulernerannut pisooqataalluinnartoq tassaavoq Nunarsuarmi aningaasatigut ajornartorsiorneq. Royal Greenlandip aningaasatigut ajornartorsiuteqalernera tassuunatigut aamma takusinnaavarput, Siumup siulittaasua Aleqa Hammond oqarpoq.
