Aleqa Hammond: -Utoqqaat aningaasagissaarnerulissapput!
Utoqqaat 100-t missaanni amerlassusillit qaammammut aningaasat pisartakkatik naammaginagit Namminersornerullutik Oqartussat eqqaani ualimut akerliussutsimik takutitsipput.
Nuummi utoqqaat Peqatigiiffianni siulersuisunut ilaasortaq Ulf Olsen aperaarput sooq utoqqaat akerliussutsimik takutitserusussimanersut.
- Kikkunnilluunniit eqqarsaatigineqarsinnaavoq utoqqaat nuliariit marluullutik 10.000 koruunit pissarsiaat tassaasarput ilaanni 6.000 koruunit angullugit ineqarnermut akiliutaasartut. Taakkulu saniatigut qaffaatit ullut tamangajaasa takkussortuarput, utoqqaalli qaffaatit nalinginik procentimik tunineqarneq ajorput.
Kisermaat aamma taama atugarliortigipput, taava qanoq ilillutik utoqqaat inuussappat? Naamik ajornaqaaq!, Ulf Olsen oqarpoq.
Aleqa Hammond aperaarput, utoqqaat piumasaat malillugu utoqqalinersiat qaffanneqassanersut.
- Naalakkersuisut inatsisartullu suleqatigiilluta sulissutigivarput utoqqaat aningaasatigut qaffaavigineqarnissaat, Aleqa Hammond oqarpoq.
Taanna qalleqqissaavoq septembarip 20-iani naalakkersuisuniit utoqqaat atugarisaat pillugu nalunaarusiamik saqqummiussisimallutik.
- Tassunga tunngatillugu naalakkersuisuniit siunnersuutigaarput utoqqalinersiaqarnermi periarfissat assigiinngitsut pingasut tikkuartorlutigik, tassalu Siumukkormiut siunnersuutaat, aappaat tassaavoq, naalakkersuisuniit naaperiutissatut toqqagarput, pingajuallu tassaavoq danskit utoqqalinersisitseriaasiat nunatsinnut tulluarsaannarlugu, Aleqa Hammond nassuiaavoq.
Taanna nangilluni erseqqissaavoq aningaasat 10,5 mio. koruunit immikkoortikkitik taakkulu 2007-mi atuuttussatut naatsorsuutigigitsik.
- 2008-mut 9-mullu aamma 20,5 mio. koruunit aamma aaqqiissuteqartitsilernissatsinnut atuutilertussatut toqqortatut immikkoortippavut, oqarpoq.
Suliaq sukkasuumik ingerlariarpat akuerineqassariarpallu naatsorsuutigineqarpoq aappaagu julip aallaqqaataani atuutilernissaa.
Taama oqarpoq Aleqa Hammond.
- Siusinnerusukkut atuutilersinnaanera aamma ammaffigaarput, apeqqutaaginnarpoq Inatsisartut Naalakkersuisullu isumaqatigiinniarnerat qanoq siusitsigissanersoq, Aleqa Hammond aamma taama oqarpoq.
