Aleqa Hammond qeqertat ataatsimersuarnerannut peqataavoq
Franskit EU-mi siulittaasunngornerminni anguniagaannut atatillugu silap pissusaata allanngoriartornerata pisuussutinut uumassusilinnut sunniuteqarnera oqallisigineqarpoq.
Ataatsimeersuarnermi EU-mik suleqateqartut qeqertat 28-t, taakkununnga Kalaallit Nunaat ilaalluni, ataatsimeersuaqataapput.
Nunarsuatsinni silap kissakkiartorneranut akisussaaqatigiinnerput pillugu Aleqa Hammondip oqalugiarnermini erseqqissarpaa, aningaasaqarniarnikkut nunanut allanut sanilliullutik mikisut assigalugit Kalaallit Nunaata ineriartornermini siuariartorniarnerminilu aamma CO2-mik mingutsitsinerminik milliartortitsisinnaanera killeqartoq. EU-milu ilaasortat sinniisui aperai, uumasunut nungusaataanngitsumik piniarsinnaatitaanermut maleruaqqusat unioqqutinngikkaluaraat, Kalaallit Nunaanni piniartut arfanniartarnerat puisinniartarnerallu EU-mi ilaasortat akiorniarsarimmassuk, tamanna qanoq ililluni naapertuilluarnertut taaneqarsinnaassanersoq.
La Réunionimi ataatsimeersuarnermi, tallimanngornerup tungaanut ingerlasussami, Aleqa Hammondip saniatigut, ICC-p Kalaallit Nunaanni siulittaasuata tullia, Carl Christian Olsen aamma peqataavoq.
