Aleqa Hammond: Pituffik toqqaannartumik aningaasarsiornikkut iluanaarutigineqanngilaq
Inatsisartunut ilaasortaq Atassummeersoq Kristian Jeremiassen qanittukkut § 36 naapertorlugu Naalakkersuisunut Pituffiup sakkutooqarfittut atorneqarnera Danmarkip naalagaaffiata aningaasarsiornikkut qanoq iluanaarutigisartigineraa paaserusullugu apeqquteqarpoq.
Danmarkip naalagaaffiata Pituffik sakkutooqarfittut toqqaannartumik aningaasatigut iluaqutigisarneraa Naalakkersuisut ilisimasaqarfiginngikkaat, Aleqa Hammond naalakkersuisut sinnerlugit akissuteqarpoq.
Taamaattorli 1956-imeersumik isumaqatigiissuteqarpoq, tassani USA-p nalunaarutigaa sakkutooqarfinni USA-p avataaniittuni sumiiffiinni pineqartuni inuit najugallit sapinngisaq naapertorlugu sulisorineqassasut.
Tamatumunnga atatillugu Aleqa Hammondip erseqqissaatigaa, assersuutigalugu Greenland Contractors sakkutooqarfimmi nalinginnaasumik sullissinissamut aserfallatsaaliinermullu isumaqatigiissuteqartoq. Sullissinerit taamaattut aningaasaqarnikkut Danmarkimi Kalaallit Nunaannilu suliffissaqarnermut tamatumalu kingunerisaanik akileraarutinit isertitatigut iluaqutaasarput. Oqaatigineqarsinnaavoq Pituffimmi sulisunit ukiuni 2005-2006-imi 65 aamma 75 miliuunit koruunit akornanni akileraarutitigut nunatta karsia isertitaqarsimammat.
Tamatuma saniatigut Joint Committeemi 2004-mi Igalikumi isumaqatigiissummi suleqatigiissutissanik arlalinnik isumaqatigiissuteqartoqartoq Aleqa Hammondip akissummini erseqqissarpaa.
