Aleqa Hammond oqaatsit pillugit oqallinnermut akuliunnianngilaq
Naalakkersuisulli siulittaasuat Aleqa Hammond oqallinnermut akuliukkumanngilaq, pissusissamisoortutut isiginnginnamiuk:
- Kina eqqortumik oqalunnersoq, eqqunngitsumilluunniit oqalunnersoq pillugu oqaaseqarnissara pissusissamisoortutut isiginngilara, tamanna pingaartippara. Isumaqarpunga inuiaqatigiinni oqaatsit arlariit atorneqartillugit oqaatsit pillugit oqallinneq piujuaannartussaavoq, tamanna aamma pissusissamisoorpoq, Naalakkersuisut siulittaasuat Aleqa Hammond oqarpoq.
Naaja Nathanielsenip kalaallinik danskinillu danskisuinnaq oqaluttunik sakkortuumik appisaluussisoqartarneranut assersuusiorluni KNR-imut qanittukkut oqaaseqarnerata kingorna oqaatsit pillugit oqallinneq sakkortuseriarpoq, Randi Brobergilu Partii Inuit sinnerlugit Inatsisartunut ilaasortaq tamanna pillugu ima oqarpoq, issuaaneq aallartippoq:
- Isumaqarpunga kikkulluunniit inuiannguit taama ikitsigisut imminnut illersorniarlutik pisinnaatitaaffigigaat illersussallugu. Nikanarsarneqarnerumuna qaangerniarneqarneranik ersersitsineq, qallunaaluarnerunngilaq, Randi Broberg KNR-imut taamanikkut oqarpoq.
Oqaatsit pillugit oqallinneq ammit qalipaataannut aallaaveqanngitsoq, Aleqa Hammond isumaqarpoq, inuiaqatigiinnilu arlalinnik oqaaseqarfiusuni oqaatsit taakku ilinniarluarnissaat pingaartillugu, oqaatsimmi tassaammata ilinniarluarsinnaanissamut, inuiaqatigiinnullu akuliunnissamut sakkussat, Aleqa Hammond oqarpoq, Naaja Nathanielsenillu oqaasii pillugit ima nangilluni:
- Oqaatsini taanna nammineq soorunami akisussaaffigissavai. Oqaatsit pillugit oqallinnermi mianersorfeqartariaqartoq, imminut pisuuteqattaannermik tunngaveqartussaanngitsoq, oqaatsillu tassaasussaapput inuiaat katersuuffissatut sakkussaat pingaarnerpaat. Taannalu kisiat kaammattuutigiinnarusupparaatorneqassasoq, Naalakkersuisut siulittaasuat Aleqa Hammond oqarpoq.
