Aleqa Hammond naalakkersuisutut tunuarpoq

Aningaasaqarnermut nunanullu allanut naalakkersuisoq ingerlaannartumik atuutilersumik tunuarpoq. Naalakkersuisut aningaasatigut aqutsinerliornerat oqaatigalugu, Aleqa Hammond naalakkersuisutut tunuarpoq. Tusagassiuutinut ualimut allagaqaateqarluni Aleqa Hammond naalakkersuisutut tunuarnerarpoq. Aleqa Hammondip tunuarniuteqarnera tigusimallugu naalakkersuisut siulittaasuata Hans Enoksenip uppernarsarpaa. Kinalu Aleqa Hammondip naalakkersuisoqarfianut inississanersoq aqagu aqaguaguluunniit paasinarsissasoq oqaatigaa. Aleqa Hammondip akisussaaffii nutaamik ivertitsinisssap tungaanut Hans Enoksenip naalakkersuisoqarfianit isumagineqassapput.
Allattoq Mads Lynge
septembarip 22-at 2008 14:07

- Aningaasaqarnermut naalakkersuisutut naalakkersuisut aningaasatigut aqutsinissamut ingerlatsinermullu siunnerfiannut akuersaarnanga akisussaaqataaffigiumanagulu peqataajunnaarnissannut aallaaviuvoq, Aleqa Hammond oqarpoq, nangipporlu:

- Aningaasatigut ingerlatsineq pitsaanerusoq aqqutissiuussissutiginiarlugu siunnersuutigisakka, pitsaanngitsumik ingerlasoqarneranut aarlerisaarutikka aammalu ilimasaarutikka tusaaneqanngitsutut ipput aalajangerpungalu taamatut ingerlatsineq akisussaaqataaffiginiarnagu, naalakkersuisuusimasoq tusagassiuutinut allappoq.

- Tunuarnera isigineqassanngilaq sapiuttutut kisiannili akisussaassuseqartutut iliuuseqarneruvoq naalakkersuisullu aningaasatigut ingerlatsinerat akisussaassuseqanngitsutut illersorneqarsinnaanngitsutullu isigagakku tunuarpunga, Aleqa Hammond naggasiilluni allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq