Aleqa Hammond: Naalakkersuisuni suleqatiginnerput ingerlalluarpoq
Hans Enoksenimik aarlerisitsisinnaagaluartoq tassaagaluarpoq Naalakkersuisunut ilaasortaq, Aleqa Hammmond, taanna Nuummi, Maniitsumi, Qeqertarsuarmi, Uummannami Qaanaamilu ajugaavoq.
Naalakkersuisunut ilaasortaaneranut kinguneqassanesoq Aleqa Hammond aperigatsinni ima akivoq:
- Naamik. Naalakkersuisuni suleqatigiinnerput ajunngitsumik ingerlavoq, naalakkersuisullu siulittaasuata ajugaanerminut uangalu ajorsarnera arlaannaatigulluunniit suliatsinnut attuumassuteqanngilaq, Aleqa Hammond oqarpoq, nangipporlu:
- Siulittaasortaarput pilluaqqujumavara, aamma Vittus Mikaelsenip sassarsimaneranut aamma qinerneqarsimaneranut pilluaqqujumavara. Uannut qinersisorpassuit tulluussimaarutigeqaakka, qujassutigeqalugillu. Inuiaqatiginni politikkikkut suliniarninnut imminut tunniuppunga. Sassarninnut tamanna pissutigerpiarpara. Nunatsinnik pitsanngorsaaqataarusuppunga, nukissaqarluarpunga, inuusuttuuvunga, Siumumi sorsuttuullunga suleqataajumassusera inuiaqatigiinnut neqeroorutigalugu tunniuppara, Siumullu ilaasortaqassutsimigut taama siuariaateqartiginera nuannaarutigeqaara, Siumumut ajugaaneruvoq pingaaruteqartorujussuaq, Aleqa Hammond oqarpoq.
Aleqa Hammond aallakaatitsivimmi pulaartoraarput, Aleqa, ajorsarnerit Naalakkersuisunut ilaasortaaninnut kinguneqassava?