Aleqa Hammond: Inuiaqatigiit toqqissisimanissaat siunertaraarput
![](/sites/default/files/styles/image_934x467/public/article_images/aleqa_giver_tv_interview_6.jpg?itok=bk5_Z41Q)
Namminersorlutik Oqartussani Naalakkersuisoqarfiit pisortaasa affaat sinneqartut qaammatit kingulliit pingasut ingerlaneranni allanik taarserneqartarnerat, ilaatigut Namminersorlutik Oqartussani inatsisilerinermut allaffiup pisortaata, Andreas Salmony-p soraarsitaanera tusagassiorfitsigut sammineqarluarpoq.
Qullersat taarseraannerujussuisa ilaatigullu soraarsitaasarnerisa kinguneranik, Nammisorlutik Oqartussani atorfillit soraarsitaanissaminnik annilaaganerulernissaat ernummatigineqarsinnaasoq, Syddansk Universitetimi proffesorip, Robert Klemmensenip annilaaganartoqartippaa. Professorip taama isumaqarnera, Aleqa Hammondip ima oqaaseqarfigaa.
- Nutaarsiassaanngilaq Namminersorlutik Oqartussani sulisut ilaat namminerisaminnik suliunnaartaranerat, taamaattumik inuiaqatigiinnut aammalumi sulisunut oqaatigisariaqarpoq, Naalakkersuisuusugut sulivungut inuiaqatigiit toqqissisimasumik atugassaqartinnissaat siunertaralugu.
Naalakkersuisut siulittaasuat, Aleqa Hammond ilaatigut taama oqarpoq. Taassuma erseqqissaarpaa, inuit ataasiakkaat pisunut attuumassuteqartut oqallisaaqisumi pineqarmata, sulisut ataatsimut pineqaratik, taamaattumillu sulisut annilaagassuteqartariaqanngitsut erseqqissaatigalugu.
Robert Klemmensenip aamma annilaaganartoqartippaa, pisortaqarfinni taarseraannerujussuup pilersissinnaammagu, sulisussanik naammattumik ilisimasalinnik pissarsiniarnerup ajornarnerulernera. Tamatumunnga Aleqa Hammond ima oqarpoq.
- Nunarsuarmi nunani sumiluunniit pisortat taarseraattuaannarput, tamanna nutaarsiassaanngilaq, pisortat taarseraattarneranni inuiaqatigiit ulorianartorsiortinneqarneq ajorput, taamaattumik porfessorip taama isumaqarnera tusaatissatut tiguinnarsinnaavara, Naalakkersuisut siulittaasuat, Aleqa Hammon radioaviisimut taama oqarpoq.