Aleqa Hammond illuatungiliuttunit isornartorsiorneqarpoq

Aappaagumut aningaasanut inatsisissaq isumaqatigiinniutigineqalerpat Aningaasaqarnermut Naalakkersuisup Aleqa Hammondip illuatungiliuttut ilaatinnianngilai. Tamanna eqqarsaatigilluagaanngitsutut nalilerusupparput, Demokraatit aningaasaqarnermut oqaaseqartartuat Palle Christiansen oqarpoq, naalakkersuisullu politikkiat iligiikkuutaarniarsarinermik taallugu.
Allattoq Mads Lynge
februaarip 25-at 2008 12:14

- Aningaasanut inatsisissap isumaqatigiinniutigineqarnerani naalakkersuisut iligiikkuutaarniarsarisinnaapput, tamanna unitsissinnaanngilarput, naalakkersuisulli amerlanerussuteqaqqalaaginnarput. Tamanna pissutaalluni aningaasanut inatsisissaq ataqatigiinngitsutut nalilerneqarsinnaassalluni, Palle Christiansen oqarpoq, nangipporlu:

- Aningaasartuutissatut kissaatigisat qanoq suminngaanniillu aningaasalersorneqassanersut piumasaraarput, assersuutigalugu taassavara Siumukkut nuna tamakkerlugu ataatsimeersuarmata nunatsinni pinngortitap pisussutaannik atuinermut akitsuummik eqqussinissaq siunnersuutigineqarmat. Siunnersuut taanna Atassummiit taperserneqarnavianngilaq, Palle Christiansen oqarpoq.

Taanna Inuit Ataqatigiit aningaasaqarnermut oqaaseqartartuannit Agathe Fontainimit isumaqatigineqarpoq, tunuliaqutaqarluarnikkut aatsaat aningaasanut inatsisissaq isumaqatigiinniutigineqarnissaa ujartorlugu. Agathe Fontain ima oqarpoq:

- Aningaasaqarnermut naalakkersuisoq Inatsisartuni partiit tamarmik isumaqatiginianngikkunigit tulluanngilaq. Isumassarsiatsialaanngilaq. Inatsisartut tamaasa tunuliaqutarineqarnissaat pingaaruteqarpoq, Inuit Ataqatigiit aningaasaqarnermut oqaaseqartartuat Agathe Fontain oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq