Aleqa Hammond: ataatsimeersuarneq pingaaruteqarpoq

Ataatsimeersuarnerup Kalaallit Nunaannut sunniutigisinnaasai pillugit ima oqarpoq:

- Sunniuteqarsinnaasorujussuuvugut. EU-mut ilaasortaanngikkaluarluta suleqataavugut, suleqateqarlutalu. Isumaqatigiissutigut EU-lu pisussaaffeqaqatigiippugut ineriartorfiusumik. Taamaakkaluartoq isumaqarpugut suleqatigiinnerput pitsaanerusinnaagaluartoq, EU-mi aalajangiisartut Issittoq pillugu ilisimasaat annertunerusuuppat, Aleqa Hammond oqarpoq, Ilulissanilu ataatsimeersuarneq Københavnimi aappagu ataatsimeersuarnissamut tikkuussisuussanerarlugu:

- Ataatsimeersuarneq Københavnimi aappagu ataatsimiinnissamut tikkuussisuusussaavoq, EU-p ersarissumik Issittoq pillugu politikkeqalernissaa ataatsimeersuarneq aqqutissiuussisussaalluni. Taassuma saniatigut silap pissusaata allanngoriartornerata kingunerisaasa ajornerulinnginissaat pillugit iliuusissat aqqutissiuunniarneqartussaallutik, Aningaasaqarnermut nunanullu allanut naalakkersuisoq Aleqa Hammnond oqarpoq.

Nunat Avannarliit ministeriisa aalajangersaasartui ataatsimeersuarnermik aaqqissuisuupput, ataatsimeersuarnerlu sisamanngorpat naammassineqassaaq.