Aleqa Hammond: Alloriarneruvoq pingaartoq
Aappariit ataatsimut akileraaruserneqartarnerata atorunnaarsinneqarnissaa naalakkersuisunit siunnersuutigineqarpoq, tamannalu pillugu inatsisartuni ullumi oqallittoqarmat siunnersuut partiinit ilassilluarneqarpoq.
- Naligiissitsineq eqqunniarneqarpoq, aappariit tamarmik immikkut namminneq isertitatik aningaasartuutitilluunniit pillugit nalunaarsuummik tunniussisalernissaat ammaassiffigineqarmat, Aleqa Hammon oqarpoq:
- Siunnersuut una akissarsiaqqortunerinnarnut arlaannaatigulluunniit tunngassuteqanngilaq. Naligiissitaanermut tunngassuteqarpoq. Nuliaagaanni uiugaanniluunnit akileraartarnermut inuttut nammineq pisinnaatitaaffiit aallaaviupput. Inuiaqatigiit akileraartarnikkut kiffartuunneqartarnerinut alloriarneq pingaartuuvoq siunnersuut pineqartoq, innuttaasullu pisariinnerusumik immersuisalernissaat anginarneqartoq, Aningaasaqarnermut naalakkersuisoq Aleqa Hammond oqarpoq.
Aappariit ataatsimut akileraaruserneqartarnerata atorunnaarsinneqarnissaanik siunnersuutip nassatarisaanik siunnersuutigineqarportaaq aappaasoq aapparisami aningaasarsianit akileraarutissaanut akiliisussaanngitsoq.
