Aleqa Hammond nunatsinni politikkimut uteqqissinnaasoq
- Uanga isummannik anitsinissara tunuarsimaarfiginngilara nakimananga sorsutassakka sorsuttarpakka, Aleqa Hammond, AG-mut, ullumi saqqummersumi, ilaatigut oqarpoq.
Maani nunatsinni tulliani qinersisoqalerpat Inatsisartunut qinersisoqassaaq, allatullu pisoqariataassanngippat, tassa qinersisoqarnissaa siusinnerusukkut suaarutigineqassanngippat, Inatsisartunut qineqqusaarneq ukiup aappaata qeqqa qaangiuppat aallartissinnaavoq.
Aleqa Hammondip aningaasanik atornerluisimanera pissutaalluni Inatsisartunut qinersinissaq kingullermik suaarutigineqarpoq, naalakkersuisummi isasoorlutik taamanikkut atorunnaarmata.
Aleqa Hammond Folketingimut kingorna ilaasortanngorpoq, aningaasanillu akiliut Folketingimeersoq Hammondip aamma atornerlussimammagu Siumumit anisitaavoq.
Folketingimilu ilaasortaagaluarluni nunatsinni pisunik malinnaavoq:
- Aap, soorunami nunatsinni pissutsinut susoqarneranullu malinnaavunga. Ajoraluaqaaq Lars-Emil Johansen sukujunnut suunngitsunut akuliuttarnera. Taamaattumik takorusunnerugaluarpara tunuliaqutaasut Kim Kielsenimik tapersersuinerunissaat, Aleqa Hammond aviisimut AG-mut oqarpoq.
- Akuttunngitsumik aperineqartarpunga qineqqusaaqqissanerlunga. Taamanikkussaru takussavarput, Aleqa Hammond oqarpoq.
