Aleqa eqqartuunneqassanngilaq
Qinigaasinnaanermut ataatsimiititaliami nipangiussisussaatitaanerminik Aleqa Hammondip unioqqutitsisimanerarneqarnera pillugu unnerluussut Naalagaaffiup Eqqartuussissuserisuata eqqartuussivik aqqutigalugu suliassanngortinnianngilaa. Atuagagdliutini ullumi saqqummersuni tamanna allaaserineqarpoq.
- Uppernarsaatissamik nassaarnissatsinnut periarfissaqanngilavut - uppernarsaatissallu inissisimanerat pissutigalugu suliaq taamaatiinnarneqarpoq, politimesterip tullersortaa, Morten Nielsen oqarpoq.
Qinigaasinnaaneq pillugu Ataatsimiititaliamut ilaasortatut nipangiussisussaatitaanini Aleqa Hammondip unioqqutissimagaa politiinut ukioq ataaseq sinnilaarlugu matuma siorna unnerluutigineqarpoq - Inatsisartunut ilaasortat politiinit eqqartuussaasimanersut ataatsimiititaliap taassuma misissortarpaa.
Atassummi siulittaasutut qinigaaqqammersup, Gerhardt Petersenip, qinigaasinnaannginnera pillugu paasissutissanik isertuussassanik partiip siulittaasua siammarterisimasoq, politiinut suliassanngortitsisoq - Atassummut ilaasortat ilagigunagaat - isumaqarpoq. Unnerluussisup oqarnera naapertorlugu paasissutissat Atassummi ilaasortanut arlalinnut Siumup siulittaasuata ingerlateqqissimavai.
Suliap ingerlanneqarnerani Aleqa Hammondip nipangiussisussaatitaanini unioqqutissimannginnerarpaa.
