Aleqa: Aqagu periarfissanik misissuilluta aallartissaagut
Ullumikkut ulloq qinersinerup unnukkuata sivisoorsuup kingorna qasuersaarfiuvoq, aamma Siumukkormiut imminut qitikkut pattalaarlutillu hurraartuussimapput. Nunatsinnilu partiit annersaata pimoorussamik sulinini aallartissavaa. Naalakkersuisooqatiginnik pilersinissaq misissorneqartussanngorpoq.
Sisamanngornermi ualikkut Siumup allaffeqarfiani kaffisungaatsiartoqassamaarpoq. Inatsisartuni partiit allat sisamaasut kaffisoriaqqusaapput, tassanilu naalakkersuisooqatigiinnik pilersitsinissamut periarfissat misissorneqassapput. Arlaannaanilluunniit mattussisoqanngilaq, kikkullu tamarmik tusaaneqarumaarput.
-Nuannaaqaanga, tulluusimaarlungalu tanngassimaarlunga, nunaqqatitta nunatta siunissaa uatsinnut tunniummassiuk. Qinersineq iluatsilluarpoq, aammali innuttaasunut nunatsinnillu pisussaaffilerneqarpugut. Ullormi ullumikkut ittumi tamat oqartussaaqataanerat nalliuttorsiutigaarput, aqagulu naalakkersuisut nutaat ataanni nuna katersuuffiusussaq ornissavarput. Tamanna qilanaarivarput, Siumup siulittaasua Aleqa Hammond qinigaaffimmi matumani Naalakkersuisunut siulittaasuunissaminut qilanaarutissaqartoq oqaluttuarpoq.
Naak qinersinissaq sioqqullugu Jens B. Frederiksenip Demokraatit Siumukkunnik naalakkersuisoqateqarusunnatik oqareersimagaluartoq, partiit allat assingalugit siunissaq pillugu kaffisorujuutaa eqqartuinissamut Siumumit qaaqquneqarsimapput. Siumukkunnut kaffisoriaqqusaasut siulliit tassaapput Atassutikkut, taava akunnerup affaata kingorna Partii Inuit naapinneqassallutik. Taava Demokraatit tullinnguutissapput, naggataatigullu, minnerunngitsumillu, naalakkersuisuutitaqartuusimasut IA kaffisoqatigineqassapput.
-Ulapputeqanngilagut. Qinersisivut Nunatsinnilu innuttaasut ataatsimut isigalugit piareersrluarsimalluta sulinissarput naatsorsuutigisinnaasariaqarpaat, Nunatta pitsaasumik siunissaqarnissaa qulakkeerniassagutsigu. Immikkoortut pingaartitavut isumaqatigiinniarnerni qaqinniarpagut. Taassappullu royalties, aatsitassarsiornermut atatillugu uraneqassutsimut qummut killissarititaata qaffanneqarsinnaanera kiisalu nunatsinni aalisartut atugaasa pitsanngorsarneqarnissaat. Aammattaaq Nunatsinni suliffissaaleqinerujussuup akiorniarnissaa pingaartittupilussuuarput, tamannami ukiuni kingullerni alliartuinnavissimavoq, Aleqa Hammond isumaqarpoq.
Nunatsinni qinersinermut inatsit malillugu Siumut qinigaaffimmi nutaami naalakkersuisunngortitsinissaminut sapaatit akunnerinik tallimanik periarfissaqarpoq. Periarfissat arlaqarput. IA-p naalakkersuisooqatigilerneratigut atituumik naalakkersuisuutitaqalerneq, imaluunniit Atassutip ilaasortaatitai marluk, Partii Inuit ilaasortaatitai marluk imaluunniit Demokraatit ilaasortaatitai marluk atorlugit naalakkersuisuutitaqalerneq. Kiisalu aamma periarfissaavoq naalakkersuisooqatigiinnik atituunik pilersitsinissaq, IA aamma Atassut aamma/imaluunniit Partii Inuit peqatigalugit Siumut naalakkersuisooqatigiinnik pilersitsillutik. Aqagu alloriarnerit siulliit pissapput, sukkasuumillu suliniartoqarnissaa ilimanaateqartupilussuuvoq.
