Alcoap misissuinini ingerlatiinnassavaa

Aluminiumik aatsitsiviliortoqarnissaanut Inatsisartut ataatsimiititaliarigallagaanik, Alcoa ataatsimeeqateqarnissaminut piareersimavoq, qaammatillu uuma naalernerani pinissaa sulissutigineqarluni.

Inuutissarsiornermut naalakkersuisoq Siverth K. Heilmann Inatsisartunut ilaasortamut Anthon Frederiksenimut akissuteqarluni taama allappoq.

Inatsisartut upernaakkut ataatsimiinnissaani erngup nukingata nukissiornermi atorluarneqarsinnaanera pillugu naalakkersuisut inatsisissatut siunnersuummik saqqummiussinissaat naatsorsuutigineqarpoq. Inatsit taanna tunngavigalugu akuersissuteqarnissamut piumasaqaatissat pillugit Alcoa isumaqatigiinniarlugu aallartinneqarsinnaassaaq, tassa Inatsisartut suliniummut piginneqataajumanatik kingusinnerusukkut aalajangissagaluarpata.

Alcoamut pilersaarummut atatillugu piginnittuunermut tunngasut siusinnerpaamik Inatsisartut ukiakkut ataatsimiinneranni aalajangiiffigineqarsinnaassasut akissummi oqaatigineqarpoq.