Alcoamut pillugu innuttaasut ilisimasaqarluarput

Alcoap aatsitsiviliornialersaarneranik pilersaarutit pillugit, 2007-mili aallartittumik innuttaasunik isumasiuinerit, Greenland Development sinnerlugu HS Analyse isumasiuisalersimavoq.

Isumasiuinermi ilanngullugu paasiniarneqarpoq, pilersaarut pillugu innuttaasut iluamik paasissutissinneqartarsimanersut. Isumasiuinerullu takutippaa ukioq manna aperineqartut 6 procentiinnaat isumaqartut paasissutissanik naammattunik tunineqartarsimallutik, siorna taama misigisimasut 17 procentiullutik.

Innuttaasut taama ikitsigisut iluamik paasissutissinneqarnermik isumaqartut akissutissaqartoq, aluminiumik aatsitsiviliornissaq pillugu ilisimatusarsimasoq ilisimatooq, Anne Merrild Hansen oqarpoq nangillunilu:

- HS Analysep isumasiunerata takutippaa innuttaasut pilersaarummut paasisaqarnerusimasut, tamanna eqqumiigineqarsinnaagaluarpoq, taamaattorli oqartoqarsinnaavoq innuttaasut ima pilersaarummut ilisimaqalersimatigaat allaat suut ilisimatitsissutaasimannginnersut paasisimallugu.

Anne Merrild Hansen oqarpoq. Taanna nangilluni ima aamma oqarpoq:

- Inuit amerlanerit pissutsinik paasisimasaqarluartarneri inuppalaartorujussuuvoq, apeqqutinillu amerlanernik tuniorarneqarunik taava apeqqutit amerlanerit soorunami takkussuutilissapput, Anne Merrild Hansen taama oqarpoq.

Nunatsinni oqartussat ukiut ingerlaneranni innuttaasunut paasissutissiisarsimapput, siunertarineqarluni innuttaasut pilersaarummut peqataatinneqarnerunissaat. Anne Merrild Hansenip isornartorsiuinermini ilaatigut oqaatigaa, innuttaasut isumaqalersinneqarsimappata pilersaarummut peqataatinneqarluarlutik, taamaattoqannginnerali paasigunikku tamanna paatsooqatigiinnermik kinguneqarluarsinnaasoq, ilaatigullu ima oqarluni:

- tamannalu kinguneqartussaavoq innuttaasut peqataatinneqarsimannginnerminnik eqqarsalernerannik.

Aluminiumik aatsitsiviliornissaq pillugu ilisimatusarsimasoq ilisimatooq, Anne Merrild Hansen taama oqarpoq.