Alcoamik suliap piffissalernera akunnappoq
Tupinnanngilaq Kalaallit Nunaanni aluminiumik aatsitsiviliornissaq kinguartinneqarmat, Greenland Developmentiusimasumi, suliffinnut aluminiumik aatsitsiviliorfissamut suliniummut siunnersueqataasimasumi pilersaarusiami pisortaasimasoq Thomas ”Tyt” Mogensen taama oqarpoq.
- Ilimanareerami, tassami aluminiumip akia pisuulluni tunisassiortut maanna annaasaqaatigalugu isertitaqaatigerpiarnaguluunniit tunisassiorneq ingerlatereerpaat.
Aluminiup nalinga 2008-miilli affaannanngupajaarsimavoq – taamaattumillu amerikamiut suliffeqarfissuat, Alcoa, Maniitsumi aluminiumik aatsitsiviliornissamik erngullu nukinganik innaallagissiorfiliornissamik pilersaarutiminik unikkallartitsivoq.
AAMMA ATUARUK Alcoa pakatsissutigaat
AAMMA ATUARUK Alcoamik suliaq Qujaukitsumit suli upperineqarpoq
Aaqqitassat amerlasimaqaat
Aatsitassarsiorniarluni pilersaarutit ikittuinnaat piviusunngorsinnaapput. Alcoallu aallartinnissaanut aaqqitassat amerlasimaqaat, Thomas ”Tyt” Mogensen oqarpoq.
- Erngup nukinganut tunngasunik inatsiseqarsimanngilagut. Taamaalillutalu erngup nukingata innaallagissiornermut atorneqartarnera pillugu inatsiseqalerpugut. Suliniutinullu angisuunut inatsiseqalernermut peqqutaaqataasorujussuulluni. Suliniutip ingerlanerani tamakku aamma suliniutigineqarput.
Naalakkersuisullu maanna allat erngup nukinganik innaallagissiorfissanut aningaasaliitinniarsarilerpaat.
AAMMA ATUARUK Maniitsup eqqaani aluminiumik aatsitsiviliornissaq unitsinneqarallartoq
Allanik suliniuteqarnissamut periarfissaqartoq
Tamannalu periarfissaasoq Thomas ”Tyt” Mogensen isumaqarpoq. Alcoalli iluaqutigiunnanngilaa.
- Aluminiummip nalinga ukiuni aggersuni sisamani tallimani annertusiunnanngitsoq ilimagaara. Suliniut pisuulluni erngup nukingata atorluarneqarsinnaanera paasineqarnikuuvoq. Suliniutillu angisuut allat erngup nikunganik annertuumik pisariaqartitsisinnaasut pileritatsinneqarsinnaanersut paasinarsissaaq.