Alcoa pillugu suliaq arriisaarunneqanngilaq
Naalakkersuisuusimasullu suliap arriippallaamik suliasimanerannik oqalunneq paasiuminaatsippaa.
Alcoa pillugu suliaq torinngitsumik suliaasimasoq Ove Karl Berthelsen 2009-imi naalakkersuisunngortoq oqarpoq. Alumiiniumik aatsitsiviliornissamut atatillugu Naalakkersuisoqatigiit Siumut Atassullu suliffeqarfimmik isumaqatiginniartartussatut Greenland Development pilersinneqarpoq.
aktieselskab-imik Greenland Development-imik pilertsisimasut naalakkersuisunngorpugut Ove Karl Berthelsen oqarpoq.
Suliffeqarfik Greenland Development Naalakkersuisoqatigiillu akornanni Suleqatigiinneq oqitsuinnaasimanngilaq.
Svend Hardenberg, Naalakkersuisut siulittaasuata Aleqa Hammond-ip naalakkersuisoqarfiani pisortanngortussaq Greenland Development-ip siulersuisuini siulittaasuuvoq Alcoa-millu isumaqatiginniartarnerni siulittaasuulluni.
- Alcoa pillugu suliaq Greenland Development atorlugu isumaqatiginniartarnerit Ove Karl Berthelsen IA-ikkullu naalakkersuisuunerisa nalaani sivisuumik ingerlavoq, Ove Karl Berthelsen oqarpoq,
- Greenland Development atorunnaarseriarlugu, Inussutissarsiornermut naalakkersuisoqarfimmut nuunneqarpoq, tassanilu suliaq sukkanerusumik ingerlanneqalerluni, Ove Karl Berthelsen oqarpoq.
Alcoa pillugu suliamut apeqqutit tusarniaanernerillu 2009-imi akineqanngitsut kigaalaarunneqarsimanerarlugit Jens-Erik Kirkegaard-ip isornarsorsiunera Ove Karl Berthelsen akissuteqarluni oqarpoq suliarujussuaq imaaliallaannaq aallartinneqarsinnaanngitsoq.
Jens-Erik Kirkegaard-ip arriippallaamik naalakkersuisuusimasut sulisimanerarlugit oqarnera Ove Karl Berthelsen-ip erseqqissumik paasinngikkaluarlugu nunami sanilerisatsinni pisimasut assersuuteqarfigai.
- Island-imi alumiiniumik aatsitsiviliorniarnermi ukiut 30it isumaqatiginniarnerit ingerlanneqarsimammata, tamanna nalinginnaasuuvoq -suliamik annertuumik pilersaaruteqartoqartillugu isumaqatiginniarnerit sivisuumik ingerlanneqartarmata, Ove Karl Berthelsen oqarpoq.