Alcoa pillugu misilittakkanik Island nunatsinnut tunniussaqarumavoq

Inuussutissarsiornermut Aatsitassanullu Naalakkersuisoq, Ove Karl Berthelsen Inatsisartut aluminiuliorfissamut ataatsimiititaliaa pilersinneqaqqammersoq ilagalugu Alcoa aamma Islandip nukissiuuteqarnermut ingerlatseqatigiiffia, Landsvirkjun, kiisalu Islandip inuussutissarsiornermut naalakkersuisua ataatsimeeqatigiartorlugit Islandimut angalavoq.
aggustip 13-at 2009 12:27

Maniitsup eqqaani aluminiuliorfissamik pilersitsinissamut periarfissanik Alcoa suleqatigalugu Naalakkersuisuusimasut misissuisitsinerat Naalakkersuisut nutaat ingerlatiinnassagaat, Ove Karl Berthelsenip Alcoamut oqaatigaa.

Islandip inuussutissarsiornermut naalakkersuisortaavata, Islandimi aluminiuliorfiup atuutilerneratigut Kalaallit Nunaat tassuuna Islandimi misilittagarineqartunik paasisassarsiorsinnaalissasoq, Katrín Júliusdóttirip, oqaatigaa.

Ove Karl Berthelsenip, suleqatini islandimiu suleqatigalugu, aluminiuliorfissap, allatigullu, soorlu assersuutigalugu takornariaqarnermut tunngasutigut, annertunerusumik suleqatigiilernissartik qilanaaraa.

Inatsisartut ukiamut ataatsimiilerpata Nunatsinni aluminiuliorfissap sulissutigineqarnerata maannamut killiffia pillugu nalunaarusiaq Naalakkersuisut saqqummiutissavaat. Aluminiuliorfissaq pillugu misissuinerit arlallit, Inatsisartut 2008-mili upernaakkut ataatsimiinneranni ingerlanneqartut nalunaarummi nassuiarneqarput, Ove Karl Berthelsen allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq