Alcoa Nunatsinni aatsitsiviliunnginnissamik aalajangeeriaannaavoq

Alumiummimik aatsitsivissatut Alcoap pilersaarutini, 2005-imili pilersaarutaasoq imaaliallaannarluni atorunnaarsissinnaavaa. Taama allappoq Aatsitassanut Naalakkersuisoq, Jens-Erik Kirkegaard, Inatsisartunut ilaasortap Siumumeersup, Ruth Heilmannip paragraf 37 naapertorlugu apeqqutaanut akissummini.
apriilip 29-at 2014 04:04

Alcoap naalakkersuisullu pilersaarutaat sumut ullumikkut killiffeqarnersoq, Ruth Heilmannip apeqquteqaatigaa.
 
Pilersaarutip sumut killiffeqarneranik sukumiinerusumik paasissutissat ukiup ataatsip ingerlanerani nalunarunnaarumaartut, Aatsitassanut Naalakkersuisup akissummini siullermik naqissuserpaa.
 
Alcoap Namminersornerullutillu Oqartussaasimasut isumaqatigiinniarnerat aallartippoq 2005-imi, taamani isumaqatigiinniutigineqarlutik isumaqatigiinniarnerup sinaakkutassaat, tamannalu aatsaat 2007-mi isumaqatigiissutaalluni atsiorneqarluni.
 
Isumaqtigiinniarnerit pingasunik immikkoortoqartut, Jens-Erik Kirkegaard akissummini allappoq.
 
- Isumaqatigiinniarnerit ataasiakkaat naammassinerini, suliniutip ingerlaqqinnissaanik imaluunniit taamaatiinnarneqarsinnaaneranik aalajangiisoqartarpoq, Ruth Heilmannip apeqquteqaataanut akissummini, Jens-Erik Kirkegaard ilaatigut allappoq.
 
Isumaqatigiinniarnerit aappassaat maanna naammassineqarluinnalersoq, Jens-Erik Kirkegaard allappoq. Teknikkimulli tunngasortaat, avatangiisinik misissueqqissaarnerit taamatullu Avatangiisinik Sunniutaasunik Nalilersuinerit suli amigaatigineqartut oqaatigalugu.
 
Aluminiumik aatsitsivinnik suliffissuaqarfinnit, Alcoa nunarsuatsinni annerpaanut tulliupput. Alcoallu Nunatsinni aatsitsiviliorniarnerminni soqutigisaannut ilaalluinnarpoq, tamaani erngup nukinganik atortoqarlutik aatsitsiviliorsinnaagamik, tassami kallerup innera annertuupilussuaq aatsitsivimmi atorfissaqartinneqartarmat.
 
Alcoap tunisassiarisartagai tassaapput timmisartunut, silaannarsualiartaatinut, assartuussinernut, illorsualiornermut taamatullu poortuutissanut atorlutussat aluminiummimik sanaajusut.
 
Aluminiummi ukiumut 340.000 tonsi Nunatsinni aatsinneqarsinnaasoq, Alcoap siusinnerusukkut nalunaarutigisareerpaa. Taamatullu nalunaarutigisareerlugu pilersaarummut aningaasat 15 milliard koruunik atorneqarnissaat, taakkunannga 8,5 milliardit koruunit aatsitsiviliornermut atugassaallutik, 6,5 milliardit koruunillu erngup nukinga atorlugu innaallagissiornermut atugassatut naatsorsuussaallutik.
 
Alcoap Nunatsinni aatsitsiviliorniarnermini naatsorsuutigigaluarpaa, aatsitsivik ukioq manna naammassineqarluni atulersinnaasoq, kisiannili tassa tamanna naluneqanngitsutut piviusunngortinneqarsinnaanngilaq. Eqqaamaneqartariaqarpormi Alcoa Islandimi aatsitsiviliorniarnerminni ukiut 30-it atorpaat pilersaarutip naammassineqarnissaanut.
 
Isumaqatigiinniarnerit pingajussaanni eqqartorneqartussaapput, suliniutip aappassanik isumaqatigiinniutigineqarnera piviusunngortinneqassanersoq, tamannali pitinnagu illuatungeriit isumaqatigiissutigeqqaassavaat, suliaq naammassineqassanersoq imaluunniit taamaatiinnarneqassanesoq, Jens-Erik Kirkegaard akissummini aamma allappoq.
 
Illuatungeriit isumaqatigiinniarnertik nangeqqissavaat maaji naalerpat, tamatumalu kingorna ukiup ataatsip ingerlanerani nalunarunnaassaaq suliniut ilumut piviusunngortinneqassanersoq, Inatsisartunut ilaasortap Siumumeersup, Ruth Heilmannip apeqquteqaataanut akissummini, Aatsitassanut Naalakkersuisoq, Jens-Erik Kirkegaard allappoq.