Alcoa-mut tunngasut Kalaallit Nunaata nammineq akisussaaffigai
Politikerit nuimasut, Kalaallit Nunaata aluminiumik aatsitsiviliornermut atatillugu piginneqataanissaanik – isertitassarpassuaqarnissamillu sinnattoqartoqarpata, akisussaaffik annertoorujussuaq tiguneqassasoq, Nunatsinni aningaasarsiorneq pillugu statsministerimut siunnersuisartut oqarput.
Alcoa-mi suliniut piviusunngussappat koruunit 18-t milliardit 23 milliardillu akornanniittunik aningaasaliisoqartariaqarpoq. Aningaasat pineqartut Nunatsinni Nunami pilersitat nalillit tamakkiisut, bruttonationalproduktimik taaneqartartut marloriaatigaat.
- Kalaallit Nunaat aningaasaleeqataanissaminik eqqarsaateqaruni, ajutoortoqassagaluarpat danskit naalagaaffiat qularnaveeqqutissatut naatsorsuutigissanngilaa, Nunatsinni aningaasarsiorneq pillugu statsministerimut siunnersuisartut allaffimmi pisortaat Steen Ryd Larsen, Weekendavisen-imut oqarpoq.
-Alcoa-mut aningaasaliissuteqarnermi ajutoortoqassagaluarpat Kalaallit Nunaata kisimi akisussaaffigissavaa, oqarpoq.
- Alcoa-mut piginneqataanissaq kalaallit namminneq aalajangigassaraat, danskillu ministerii akuliunnavianngillat. Taamaammat aamma Kalaallit Nunaata aalajangiinini nammineq akisussaaffigissavaa ajutoortoqaraluarpallu nammineq akisussaaffigissallugu, Steen Ryd Larsen erseqqissaavoq.
Weekendavisen-imi allaaserisami Grønlandsbanken-imi pisortaasimasoq Svend-Erik Danielsen, nunatsinni ukiuni 33-ini sulisimasoq aamma apersorneqarpoq, taanna eqqarsarnartoqarneraavoq.
- Isumaqarpunga, Kalaallit Nunaata qaammatit sisamat tallimalluunniit ingerlanerinnaani, koruuninik milliardilikkaanik nalilimmut piginneqataanissaminut aalajangiinissaa assut eqqarsarnartoqartoq. Imaassinnaavoq Kalaallit Nunaanni alumiumik aatsitsiviliornissaq isumassarsiatsialaasoq, taamaattumik suliffissualiornissamut atatillugu akuersissuteqarnermut atsioqatigiissuteqassagaanni Kalaallit Nunaata aningaasartuuteqannginnissaa qulakkeerniarneqartariaqartoq, Svend Erik Danielsen aviisimut oqarpoq.
Assersuutigaa Norgemi 1905-imili misilittagaqarfigineqartoq, tassa Norge suliffissuarmik pilersitsiviussatilluni akuersissuteqarnerminut atatillugu, suliffissuup Norgep aningaasaqarneranut sunniuteqarnerlunnginnissaa qulakkeertarsimavaa.
Alcoa-mut piginneqatigiinnissutinut tunngasut, inatsisartut ukiaru oqaluuserissavaat.
