Alcoa-mut piareersaanermut 374 milloni koruunit immikkoortineqarput

Alcoap aluminiuliorfissarsua aningaasanut inatsisissatut siunnersuummi inituunut ilaavoq. Suliap ineriartortinnissaanut Naalakkersuisut 374 millioner koruuninik immikkoortitsipput. Aningaasat qanoq piginittooqataanissamik 2009-mi aalajanginnginnermi ilisimasaqarnerulernissamut atorneqassasut, aningaasanut naalakkersuisoq, Aleqa Hammond oqarpoq.
Allattoq Jens Thorin
aggustip 15-at 2008 15:36

- Aalajangerneq imannaanngitsuuvoq, taamaattumillu nunatta piareersarluarsimanissaa pingaaruteqarpoq. Ilisimasassavut pisariaqartut ilisimasariaqarpavut. Avatangiisit sulisoqarsinnaanissamut ilinniartitseqqinnissamut, inissaqarniarnermut, umiarsualiveqarnermut assigiinngitsutigullu misissugassavut amerlapput, aningaasanut naalakkersuisoq oqarpoq.

Alcoa-mik isumaqatigiissuteqartigani, Inatsisartut paasissutissanik sunilluunniit amigaateqannginnissaat, Aleqa Hammond-ip pingaartippaa.

Aluminiuliorfik aallartikkaluarpat, suli nalunarpoq, nunatta qanoq isertitsissutigisinnaaneraa, nunatta qanoq piginneqataanissaa apeqqutaalluni.

- Periarfissat marluupput. Affaanik piginneqataasinnaavugut, imaluunniit atortitsisinnaanermik isumaqatigiissusiorsinnaavugut. Piginneqataagutta soorunami nunatsinnut akisunerussaaq, illuanilllu atortitsiinnarutta inuiaqatigiinnut akikinnerussalluni, Aleqa Hammond oqarpoq.

Alcoa-li toqqarneqanngippat, aningaasaliissutissat atorneqassanngitsut, aningaasanut naalakkersuisoq, Aleqa Hammond, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq