Alcoa Islandimi ajornartorsiorpoq
Naalakkersuisut suli isummerfiginngilaat Alcoap Maniitsup eqqaani aluminiumimik aatsitsiviliorniarnera akuerineqassanersoq itigartinneqassanersorluunniit.
Pisulli nutaat takutippaat Alcoap pilersitsiniartarnermini naalakkersuisut isummernerat kisiat pinnagu aamma innuttaasut qisuariaataat tusaaniartarai.
Islandimi aatsitsiviliassatut pilersaarut unitsinneqanngujoortoq, Islandimiut aviisiat Visir.is allaaserinnippoq.
Visirip allaaserisaa naapertorlugu Alcoakkormiut qatsulluinnarpaat innuttaasunit suliniutip akerliuffigineqarnera tamannalugooq pissutigalugu illoqarfiup Húsavikip eqqaani aatsitsiviliorniarneq unitsiinnarneqanngujoorpoq.
- Paasinarpoq aatsitsivik 360.000 tonsinik oqimaassusilik piviusunngortussaajunnaartoq, taama oqarpoq Hordur Arnarsson Islandimi innaallagissamik pilersuisut annersaata qullersaa taakkuuppullu Alcoap aatsitsivissaanut sarfamik pilersuisussaagaluartut.
Islandimiut inuussutissarsiornermut aviisiat allaaserinnippoq akuersissutit naammassiniaasaarnerat pissutigalugu sanaartorniat utaqqeqqissinaajunnaalersut.
Aalajangerniarnerup kinguartinneqartarneranut pissutaasut ilagaat Islandimiut avatangiisinut ministeriata pilersaarummut akerliulluni nalunaartarnera.
Tamakku saniatigut suliffeqarfissuaq Carbon Recycling pilersaarpoq CO2-mik methanol-inngortitsissumik sananiarluni. Tamannalu pissappat sarfamik pisariaqartinneqartoq marluinnut taakkununnga amigalissaaq.
Alcoa Islandimi ataatsimik aatsitsiveqareerpoq taannalu siorna qaartoornermit annertuumik eqqorneqarpoq. Aatsitsiviulli siunissaq ungasinnerusoq eqqarsaatigalugu annerusumik sunniuteqarnavianngilaq.
